ខេត្តកំពង់ធំនឹង«បំពាក់បង្គោលភ្លើងសូឡា»ប្រវែង១៤៤គីឡូតាមដងផ្លូវជាតិលេខ៦

កំពង់ធំ៖រដ្ឋបាលខេត្តកំពង់ធំ បានបើក«យុទ្ធនាការបំពាក់បង្គោលភ្លើងសូឡា នៅតាមដងផ្លូវជាតិលេខ ៦ » នៅក្នុងភូមិសាស្ត្រខេត្តកំពង់ធំ ពីព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាប ប្រវែងសរុប ១៤៤ km ឱ្យបានរួចរាល់ទាំងស្រុង នៅត្រឹមដំណាច់ឆ្នាំ២០២៦ ខាងមុខ។នេះបើយោងតាមលោក នួន ផារ័ត្ន អភិបាល នៃអភិបាលខេត្តកំពង់ធំ។

យោងតាមលោក នួន ផារ័ត្ន បានគូសបញ្ជាក់ថា ក្រោមការចង្អុលបង្ហាញរបស់សម្ដេច ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង ក្រោមការគាំទ្រពី លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និង ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ, រដ្ឋបាលខេត្តកំពង់ធំ បានចាប់ផ្តើមដឹកនាំអនុវត្តជាជំហានៗ ជាមួយការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន នូវ «យុទ្ធនាការបំពាក់បង្គោលភ្លើងសូឡា នៅតាមដងផ្លូវជាតិលេខ ៦ »។

បើតាមលោក នួន ផារ័ត្ន  «យុទ្ធនាការបំពាក់បង្គោលភ្លើងសូឡា នៅតាមដងផ្លូវជាតិលេខ ៦ » នឹងរៀបចំនៅក្នុងភូមិសាស្ត្រខេត្តកំពង់ធំ ពីព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាប ប្រវែងសរុប ១៤៤ km ឱ្យបានរួចរាល់ទាំងស្រុង នៅត្រឹមដំណាច់ឆ្នាំ២០២៦ ខាងមុខ។

លោកថ្លែងថា "គម្រោងដ៏ធំនេះ ពិតជាមានសារៈសំខាន់ណាស់ សម្រាប់ធានាភាពងាយស្រួលក្នុងការធ្វើដំណើររបស់បងប្អូនប្រជាពលរដ្ឋនៅពេលមេឃងងឹត និងចំពោះបងប្អូនប្រជាពលរដ្ឋដែលរស់នៅតាមដងផ្លូវជាតិលេខ ៦ ព្រមទាំងដើម្បីពង្រឹងការងារសន្តិសុខ"

យោងតាមប្រភពបន្ថែមពី រដ្ឋបាលខេត្តកំពង់ធំ សម្រាប់ដើមឆ្នាំនេះ រដ្ឋបាលខេត្តបានដាក់ «បង្គោលភ្លើងសូឡា»ជាង ៦០០ លើ ៤០០បង្គោលដែលមានស្រាប់ សរុបបានជាង ១០០០ បង្គោល។ សម្រាប់ឆ្នាំ២០២៥ នេះ នឹងដាក់ឱ្យបាន ៥០% តាមការគ្រោងទុក និង ឆ្នាំ ២០២៦ ដាក់ ៥០% បញ្ចប់តាមផែនការ៕