ស្ពានអាកាស«មរតកតេជោ» គ្រោងបើកដំណើរការមុនចូលឆ្នាំខ្មែរ

ភ្នំពេញ៖ ស្ពានអាកាស«មរតកតេជោ»គ្រោងបើកដំណើរការឲ្យប្រើប្រាស់មុនពេលចូលឆ្នាំខ្មែរ ដោយមានវត្តមានសម្តេច ហ៊ុន ម៉ាណែត ចូលរួមសម្ភោធបើកឲ្យប្រើប្រាស់ជាផ្លូវការ នៅថ្ងៃទី៧ ខែមេសា ឆ្នាំ២០២៥។នេះបើយោងតាមប្រភពពីរដ្ឋបាលរាជធានីភ្នំពេញ។

ស្ពានអាកាសមរតកតេជោ ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន, មហាវិថីព្រះមុនីវង្ស និង មហាវិថីយោធពលខេមរភូមិន្ទ(ផ្លូវ២៧១) ក្នុងខណ្ឌចំការមន និងខណ្ឌមានជ័យ។សម្រាប់សាលារាជធានីភ្នំពេញ ការដាក់ដំណើរការមុនចូលឆ្នាំខ្មែរនេះ ដើម្បីកាត់បន្ថយការកកស្ទះចរាចរណ៍របស់ប្រជាពលរដ្ឋ ចំណេញពេលវេលា ថវិកា កាត់បន្ថយគ្រោះថ្នាក់ និងធ្វើឲ្យដំណើរឆ្លងកាត់ទៅខេត្តនាពេលបុណ្យចូលឆ្នាំមានការងាយស្រួល និងរហ័សជាងមុន។

គួរបញ្ជាក់ថា ស្ពានអាកាសមរតកតេជោ បានបើកការដ្ឋានសាងសង់កាលពីខែ សីហា ឆ្នាំ២០២២ ដោយគ្រោងនឹងចំណាយពេល ៣៦ខែ ចំណាយប្រាក់សាងសង់ប្រមាណ ៣៦លានដុល្លារ។ កាលពីថ្ងៃទី១ ខែមេសា ឆ្នាំ២០២៤កន្លងទៅ ស្ពានបានបើកដំណើរការប្រើប្រាស់ ដំណាក់កាលទី១ (ស្ពានអាកាសជាន់ទី២) ដែលតភ្ជាប់ពីមហាវិថីសម្តេចតេជោ ហ៊ុន សែន មក មហាវិថីព្រះមុនីវង្ស ឲ្យប្រើប្រាស់ជាបណ្តោះអាសន្ននៅមុនបុណ្យចូលឆ្នាំខ្មែរឆ្នាំ២០២៤។

ជាក្តីរំពឹងស្ពានអាកាសថ្មីនេះ នឹងដោះស្រាយបាននូវលំហូរចរាចរណ៍ពីខេត្តកណ្ដាលឆ្លងកាត់មហាវិថីតេជោហ៊ុន សែន ពីព្រលានយន្តហោះថ្មី ខេត្តកណ្ដាល ចូលមករាជធានីភ្នំពេញ និងទី ២ ទៀត អាចកាត់បន្ថយបាននូវការកកស្ទះចរាចរណ៍នៅតាមបណ្ដោយផ្លូវជាតិ ១ ចូលមករាជធានីភ្នំពេញ៕