ក្រសួងរ៉ែ និងថាមពល៖ សព្វថ្ងៃនេះ ៩៩% នៃភូមិទាំងអស់នៅកម្ពុជា ទទួលបានអគ្គិសនីពីបណ្តាញបញ្ជូនជាតិ

ភ្នំពេញ៖ ក្នុងរយៈពេល ១៥ឆ្នាំកន្លងមកនេះ សមត្ថភាពផលិតថាមពលអគ្គិសនីរបស់កម្ពុជាបានកើនឡើងជាង ៨ (ប្រាំបី) ដង។ នេះបើយោងតាមប្រភពព័ត៌មានពីគេហទំព័រផ្លូវការរបស់ក្រសួងរ៉ែ និងថាមពល នារសៀលថ្ងៃទី២៤ ខែមីនា ឆ្នាំ២០២៤នេះ។

យោងតាមគេហទំព័រផ្លូវការនៃ ក្រសួងរ៉ែ និងថាមពល នារសៀលថ្ងៃទី២៤ ខែមីនា ឆ្នាំ២០២៤ បានឱ្យដឹងថាកាលពី១៥ឆ្នាំមុន កម្ពុជាមានត្រឹមតែប្រមាណ ៣០%នៃភូមិតែប៉ុណ្ណោះ ដែលទទួលបានអគ្គិសនី ។ យ៉ាងណាមិញ សព្វថ្ងៃនេះ ៩៩% នៃភូមិទាំងអស់នៅកម្ពុជាទទួលបានអគ្គិសនីពីបណ្តាញបញ្ជូនជាតិ។ ​

តាមប្រភពដដែលនេះ បានឱ្យដឹងបន្តទៀតថា កាលពីជាងមួយទសវត្សមុន ការប្រើអគ្គិសនីតាមផ្ទះមានត្រឹមតែ ១៥% តែបច្ចុប្បន្នបានកើនឡើងរហូតដល់ ៩៤% ។

បើតាមក្រសួងរ៉ែ និងថាមពល គម្រោងថាមពលថ្មីៗបន្តទៀត នឹងផ្តោតលើការផ្តល់ការងារដល់ស្ត្រីឱ្យបាន ៦០% នៅក្នុងការសាងសង់ និង ៥០% នៅក្នុងការធ្វើប្រតិបត្តិការ។ វឌ្ឍនភាពនេះបានពង្រឹងសេដ្ឋកិច្ចរបស់កម្ពុជា និងលើកកម្ពស់បរិយាបន្ន៕