គម្រោងលើកកម្រិតគុណភាពផ្លូវជាតិលេខ៤៨សម្រេចបាន៩៣,២៨%គិតត្រឹមថ្ងៃទី២៣ខែមីនា

កោះកុង៖ គិតត្រឹមថ្ងៃទី២៣ ខែមីនា ឆ្នាំ២០២៥នេះ គ្រប់កំណាត់ នៃគម្រោងលើកកម្រិតគុណភាពផ្លូវជាតិលេខ៤៨ ប្រវែង ១៤៨គីឡូម៉ែត្រ ចាប់ពីបំបែកផ្លូវជាតិលេខ៤ រហូតដល់ក្រុងខេមរភូមិន្ទ ខេត្តកោះកុង សម្រេចលទ្ធផល៩៣,២៨%។ នេះបើតាមការបញ្ជាក់របស់លោក ផន រឹម អ្នកនាំពាក្យក្រសួងលសាធារណការ និងដឹកជញ្ជូន។

បើតាមលោក ផន រឹម គ្រប់កំណាត់ នៃគម្រោងលើកកម្រិតគុណភាពផ្លូវជាតិលេខ៤៨ ចាប់ពីបំបែកផ្លូវជាតិលេខ៤ រហូតដល់ក្រុងខេមរភូមិន្ទ ខេត្តកោះកុង កំពុងសម្រុកអ៊ុត AC, គូសគំនូសចរាចរណ៍បែកចែកទ្រូង, ដំឡើងបង្គោលគីឡូម៉ែត្រ, ដំឡើងផ្លាកសញ្ញាចរាចរណ៍, ដំឡើងផ្លាកសញ្ញាកំណត់ល្បឿន...។ល។

លោកបន្តថា ផ្លូវជាតិលេខ៤៨ គឺជាខ្សែផ្លូវដ៏សំខាន់ និងយុទ្ធសាស្ត្រ ប្រកបដោយសក្តានុពលសេដ្ឋកិច្ច ពាណិជ្ជកម្ម ដឹកជញ្ជូន ភស្តុភារកម្ម ទេសចរណ៍។ ក្រុមការងារកំពុងប្រឹងប្រែងបញ្ចប់ការអ៊ុត AC ឱ្យរួចរាល់នៅបំណាច់រដូវប្រាំងខាងមុខនេះ៕