ក្រចេះ៖ តំបន់គ្រប់គ្រង និង ការពារសត្វផ្សោតទន្លេមេគង្គ ស្ថិតក្នុងខេត្តក្រចេះ មានទំហំ ២១ ៩៦៦.៥១ ហិកតា ត្រូវបានចុះបញ្ជីជាដីរដ្ឋ ដែលមានឯកសារជាប្លង់រឹងចេញដោយលោកសាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
យោងតាមក្រសួងកសិកម្ម តំបន់គ្រប់គ្រងនិងការពារសត្វផ្សោតទន្លេមេគង្គ មានទំហំ ២១ ៩៦៦.៥១ ហិកតា ក្នុងខេត្តក្រចេះ ត្រូវបានចុះវិញ្ញាបនបត្រសម្គាល់ម្ខាស់អចលនវត្ថុ ជាសម្បត្តិរបស់រដ្ឋ ក្រោមការមើលថែ និង ការពារអភិរក្សសត្វផ្សោត ជៀសវាងការគំរាមគំហែងរហូតផុតពូជ។
តំបន់គ្រប់គ្រងនិងការពារសត្វផ្សោតទន្លេមេគង្គ ត្រូវបានចុះបញ្ជីតាមបច្ចេកទេសសុរិយោដី និងច្បាប់ភូមិបាល ដោយក្រសួងរៀបចំដែនដី នគរូបនីយកម្ម និងសំណង់ និង កាន់កាប់ដោយក្រសួងកសិកម្ម រុក្ខាប្រមាញ់ និងនេសាទ ដោយមានការគ្រប់គ្រងពីក្រសួងសេដ្ឋកិច្ច និងហិរញ្ញវត្ថុ ទៅតាមច្បាប់ជាធរមាន។
គួរបញ្ជាក់ថា តំបន់គ្រប់គ្រងសត្វផ្សោតទន្លេមេគង្គមានប្រវែង១២០គីឡូម៉ែត្រ ក្នុងនោះខេត្តស្ទឹងត្រែងមានប្រវែង៣៥គីឡូម៉ែត្រ និង ខេត្តក្រចេះមានប្រវែង៨៥គីឡូម៉ែត្រ ដែលសន្ធឹងចាប់ពីប៉ែកខាងជើង ក្រោមស្ពានមិត្តភាពកម្ពុជា ចិន ស្ទឹងត្រែង ក្នុងខេត្តស្ទឹងត្រែង រហូតដល់ក្បាលកោះទ្រង់ ក្នុងខេត្តក្រចេះ។បច្ចុប្បន្នតំបន់ទាំងនេះ បានក្លាយជាតំបន់ទេសចរណ៍ដ៏សំខាន់ភ្ញៀវទេសចរលេងកម្សាន្ត៕
.jpg?1742195050)
.jpg?1742195081)
.jpg?1778143461)
