រដ្ឋមន្ត្រីក្រសួងមហាផ្ទៃនឹង​​បញ្ជូន​រាល់​មន្ត្រី​នគរបាល​រូប​ណា​«ល្មើស​វិន័យ»​ទៅ​ធ្វើ​ការ​នៅ​ព្រំ​ដែន​ពី​៣​ទៅ​៦ខែ

ភ្នំពេញ៖ លោក​រដ្ឋមន្ត្រី​មហាផ្ទៃ​ ស សុខា​ នៅថ្ងៃទី ១៧ មីនានេះ បានចេញសារព្រមានទៅកាន់មន្ត្រីនគរបាលក្រោមឱវាទ ឱ្យបញ្ជូនទៅធ្វើការនៅព្រំដែនតែម្ដង ចាប់ពី៣ទៅ៦ខែ រាល់មន្រ្តីនគរបាលរូបណាប្រព្រឹត្តល្មើសវិន័យ។នេះបើតាមលោក រ៉េន រតនៈ អ្នកនាំពាក្យលោក​រដ្ឋមន្ត្រី​មហាផ្ទៃ​ ស សុខា​។

យោងតាមលោក រ៉េន រតនៈ បានគូសបញ្ជាក់ថា "ឯកឧត្តមអភិសន្តិបណ្ឌិត ស សុខា បានផ្ដល់ការណែនាំឱ្យបញ្ជូនទៅធ្វើការនៅព្រំដែនតែម្ដង ចាប់ពី៣ទៅ៦ខែ រាល់មន្រ្តីនគរបាលរូបណាប្រព្រឹត្តល្មើសវិន័យ....។ អង្គភាពជំនាញ នឹងសម្រេចបញ្ជូនជំនួសឱ្យការបន្ថយស័ក្ដិ...ករណីខ្លះបន្ថយទាំងស័ក្ដិ និងថែមទាំងបញ្ជូនទៅព្រំដែន។

លោកបានលើកយកសម្តីដើមរបស់លោក ស សុខាថា «បានធ្វើការស្រួលនៅតាមអង្គភាព មិនខិតខំធ្វើឱ្យល្អទេ បែរជាទៅបង្ករឿងល្មើសវិន័យ! ដូច្នេះមានតែឱ្យទៅព្រំដែន ដើម្បីដឹងថាកងកម្លាំងនៅទីនោះគាត់លំបាកកម្រិតណា មកវិញកែប្រែខ្លួន ហើយខិតខំធ្វើការឱ្យបានល្អ...?»