លោក ជួន ណារិន្ទ លើកឡើងកត្តា៣ធំៗបណ្តាលឱ្យមាន«គ្រោះថ្នាក់ចរាចរណ៍»នៅរាជធានីភ្នំពេញ

ភ្នំពេញ៖ លោក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លើកឡើងថា កត្តាបីធំៗ ដែលបណ្តាលឱ្យមានគ្រោះថ្នាក់ចរាចរណ៍ គឺ ការបើកបរហួសល្បឿនកំណត់ ការមិនគោរពសិទ្ធ និង ការបើកបរក្នុងស្ថានភាពស្រវឹង។

ក្នុងបទសម្ភាសន៍ជាមួយអ្នកសារព័ត៌មាន លោក ជួន ណារិន្ទ បានឱ្យដឹងថា ក្រោយការវាយតម្លៃ គ្រោះថ្នាក់ដែលបណ្តាលឱ្យខូចខាត របួស​ និងបាត់បង់ជីវិត ភាគច្រើនកើតឡើងនៅពេលយប់ ស្ទើរតែ ៧០%។ កត្តាបីធំៗ ដែលបណ្តាលឱ្យមានគ្រោះថ្នាក់ចរាចរណ៍ មានដូចជា លំដាប់ទី១ កត្តាមិនគោរពការបើកបរកំណត់ល្បឿនប្រមាណ ជាពិសេសនៅតំបន់សាលារៀន និងតំបន់ផ្សារជាដើម ដែលបណ្តាលឱ្យមានគ្រោះថ្នាក់កើតមានឡើង។ ទី២ គឺការមិនគោរពសិទ្ធ​ និងទី៣ គឺការបើកបរក្នុងស្ថានភាពស្រវឹង ដែលជាកត្តាមួយកើនឡើងគួរជាទីកត់សម្គាល់ក្នុងដើមឆ្នាំ២០២៥។

បើតាម លោក ជួន ណារិន្ទ ការកើនឡើងគ្រោះថ្នាក់ចរាចរណ៍ដោយសារការបើកករក្នុងស្ថានភាពស្រវឹង មានការកើនឡើងគួរ​ឱ្យកត់សម្គាល់បើប្រៀបធៀបទៅឆ្នាំ២០២៤ មានត្រឹមតែ ៥% តែប៉ុណ្ណោះ យ៉ាងណាមិញ ត្រឹមត្រីមាសទី១ ឆ្នាំ២០២៥ ការបង្កការខូចខាត របួសស្នាម និងបាត់បង់ជីវិត ដោយសារការបើកបរក្នុងស្ថានភាពស្រវឹង មានការកើនឡើង​ដល់ ១១% ។

ជាវិធានការបន្ត លោក ជួន ណារិន្ទ ក្នុងនាមជា ស្នងការនគរបាលរាជធានីភ្នំពេញ នឹងបន្តក្នុងការពង្រឹងសកម្មភាពបីធំៗ គឺ ផ្សព្វផ្សាយការអប់រំ វិធានការជំនាញ អនុវត្តច្បាប់ម៉ឺងម៉ាត់ ដើម្បីធ្វើឱ្យមានការថមថយនៃគ្រោះថ្នាក់ចរាចរណ៍៕