មន្ត្រីឧទ្យានុរក្សប្រទះឃើញសត្វ«ខ្ទីង២ក្បាល មេនិងកូន»ដែនជម្រកសត្វព្រៃ ព្រៃឡង់-បឹងពែរ

ព្រះវិហារ៖ មន្ត្រីឧទ្យានុរក្សប្រចាំស្នាក់ការដំណាក់ហ្លួង នៅថ្ងៃទី ២៧ ខែកុម្ភៈនេះ បានប្រទះឃើញសត្វខ្ទីង២ក្បាល មេនិងកូន (អាយុប្រហែល១ឆ្នាំ) ដែនជម្រកសត្វព្រៃ ព្រៃឡង់-បឹងពែរ នៅចំណុចជិតភ្នំក្រៀល ភូមិភ្ញាក់រលឹក ឃុំធ្មា ស្រុកជ័យសែន ខេត្តព្រះវិហារ។

បើតាមក្រសួងបរិស្ថាន បានបញ្ជាក់ថា សត្វខ្ទីង ត្រូវបានចាត់ទុកជាប្រភេទសត្វព្រៃកម្ររបស់ពិភពលោកដែលបានចុះក្នុងបញ្ជីក្រហម IUCN ក្នុងកម្រិត VU មានន័យថាជាសត្វងាយរងគ្រោះថ្នាក់ជាសាកល។ បច្ចុប្បន្នសត្វខ្ទីង ទូទាំងពិភពលោកមានចំនួនប្រមាណជាង ២១ ០០០ក្បាល ដែលភាគច្រើនរស់នៅក្នុងប្រទេសនាតំបន់អាស៊ីខាងត្បូង និងតំបន់អាស៊ីអាគ្នេយ៍ប៉ុណ្ណោះ។

ទន្ទឹមនឹងនេះ គេនៅមិនទាន់មានទិន្នន័យច្បាស់លាស់ថា នៅកម្ពុជានៅសល់សត្វខ្ទីងចំនួនប៉ុន្មាននៅឡើយនោះទេ។ ប៉ុន្តែយោងតាមទិន្នន័យ ទទួលបានពីម៉ាស៊ីនថតស្វ័យប្រវត្តិ និងពីមន្ត្រីឧទ្យានុរក្សដែល បានចុះល្បាតនៅតាមតំបន់ការពារធម្មជាតិនានាបានឱ្យដឹងថា សត្វខ្ទីងមានវត្តមាននៅតាមតំបន់ការពារធម្មជាតិផ្សេងៗ៕