ពលរដ្ឋប្រគល់«ចម្លាក់កញ្ចាំង»ធ្វើពីថ្មភក់ចំនួន១ជូនអាជ្ញាធរជាតិ បន្ទាប់ពីប្រទះឃើញក្នុងដីស្រែ

សៀមរាប៖ លោក ថ្នម តូច ជាប្រជាពលរដ្ឋនៅភូមិកន្តួត ឃុំកន្តួត ស្រុកស្វាយលើ ខេត្តសៀមរាប បានយកចម្លាក់កញ្ចាំងធ្វើពីថ្មភក់ចំនួន១ មកប្រគល់ជូនអាជ្ញាធរជាតិអប្សរាកាលពីថ្មីៗនេះ បន្ទាប់ពីលោកបានប្រទះឃើញនៅក្នុងដីស្រែ ហើយបានយកមករក្សាទុកមួយរយៈ។

ការប្រគល់ទទួលចម្លាក់កញ្ចាំងនេះ គឺមានការចូលរួមពីក្រុមអ្នកចុះបញ្ជីសារពើភណ្ឌរបស់នាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរា សហការជាមួយមន្ត្រីមន្ទីរវប្បធម៌ខេត្ត និងនគរបាលការពារបេតិកភណ្ឌខេត្តសៀមរាប លោក ខេង រ៉ា មេបញ្ជាការនគរបាលជាតិប្រចាំទិសប្រាសាទព្រះវិហារ ព្រមទាំងអាជ្ញាធរដែនដី។

លោក ឈូក សុម៉ាឡា មន្ត្រីចុះបញ្ជីវត្ថុបុរាណនៃអាជ្ញាធរជាតិអប្សរា បានលើកឡើងថា ចម្លាក់កញ្ចាំងធ្វើពីថ្មភក់ ដែលមានបណ្តោយ៤០សង់ទីម៉ែត្រ និងទទឹង៤៥សង់ទីម៉ែត្រ គឺជាសម្ភារលម្អសំណង់ប្រាសាទបុរាណ ដែលបុព្វបុរសខ្មែរ តែងដាក់បន្តុបនៅតាមថ្នាក់ៗជាផ្នែកនៃកំពូលប្រាសាទ។ ចម្លាក់កញ្ចាំងនេះ ធ្វើពីថ្មតែមួយដុំ ដោយឆ្លាក់ជារាងដូចសាជី ហើយស្រួចនៅផ្នែកខាងលើ និងផ្នែកខាងក្រោមមានបាតបួន។ ចម្លាក់កញ្ចាំងនេះ មានឆ្លាក់ជានាគក្បាល៥ ដែលក្បាលកណ្តាលធំ និងខ្ពស់ជាងគេ ហើយនៅចំកណ្តាលនៃអង្កត់ទ្រូង គឺពុះចែកផ្ទៃនៃកញ្ចាំងនោះអាចធ្វើឱ្យមើលឃើញក្បាលនាគទាំង៣ជ្រុងផ្សេងៗគ្នា។ លោកបន្ថែមថា តាមការសង្កេតលើចម្លាក់ និងក្បូរក្បាច់ដែលឆ្លាក់លើកញ្ចាំងនាគក្បាល៥នោះ អាចនៅក្នុងអំឡុងសតវត្យរ៍ទី១២នៃគ្រិស្តសករាជ។

គួរបញ្ជាក់ថា ការប្រគល់ចម្លាក់ជូនអាជ្ញាធរជាតិអប្សរា ដែលជាស្ថាប័នជំនាញនេះ គឺមានន័យថា ប្រជាពលរដ្ឋមានការយល់ដឹងនិងបានចូលរួមថែរក្សាមរតកដូនតា ដោយអភិរក្សស្របតាមបច្ចេកទេស និងចុះបញ្ជីកំណត់អត្តសញ្ញាណវត្ថុ ដោយរក្សាទុកនៅទីតាំងមានសុវត្ថិភាព ព្រមទាំងអាចតាំងបង្ហាញនៅសារមន្ទីរដើម្បីឱ្យមហាជនបានទស្សនាផង៕