អភិបាលខេត្តតាកែវ៖ ករណីឆេះព្រៃ«លើភ្នំជីសូរ»គ្រប់គ្រងបាន និងមិនប៉ះពាល់ផ្ទះពលរដ្ឋ

តាកែវ៖ លោក វ៉ី សំណាង អភិបាលខេត្តតាកែវបានឲ្យដឹងថា ករណីអគ្គីភ័យឆាបឆេះព្រៃឈើលើខ្នងភ្នំជីសូរ នៅម៉ោង ៦ និង៣០នាទី យប់នៅថ្ងៃទី២៣ កុម្ភៈ ម្សិលមិញនេះ អាជ្ញាធរខេត្ត និង កងកម្លាំងគ្រប់គ្រងស្ថានការណ៍បានទាំងស្រុង នៅម៉ោង ៨យប់ ថ្ងៃ,ខែ ឆ្នាំដដែល។ ករណីភ្លើងឆេះព្រៃនេះ លោកអភិបាលបញ្ជាក់ថា មិនបង្កការខូចខាតដល់ផ្ទះប្រជាពលរដ្ឋនោះទេ។

ក្នុងបទសម្ភាសន៍ជាមួយ ស៊ីស៊ីថាមស៍ លោកបានណែនាំដល់ សមត្ថកិច្ចកំពុង​បន្តស្រាវជ្រាវរក មូលហេតុនៃការឆេះ ឱ្យបានច្បាស់ និង បានអំពាវនាវឱ្យពលរដ្ឋ ចូលរួមបង្ការឬទប់ស្កាត់ ការឆេះព្រៃទាំង​អស់គ្នា ដើម្បីថែរក្សាធនធានធម្មជាតិព្រៃឈើ សត្វព្រៃ និងសតុវត្ថិភាពផ្ទាល់ខ្លួន។

គួរបញ្ជាក់ថា អគ្គិភ័យបានឆាបឆេះព្រៃនៅជើងភ្នំជីសូរ ស្ថិតនៅស្រុកសំរោង ខេត្តតាកែវ ចាប់តាំងពីម៉ោង៦និង៣០នាទី ល្ងាចថ្ងៃទី២៣ ខែកុម្ភៈ ឆ្នាំ២០២៥ ខណៈបច្ចុប្បន្នសមត្ថកិច្ចកំពុងស្រាវជ្រាវពីមូលហេតុនៃករណីភ្លើងឆេះព្រៃនេះ៕