រដ្ឋចំណាយលុយជាង ២៨៥លានដុល្លារ តាមរយៈកម្មវិធីជំនួយសង្គមជួយពលរដ្ឋជិត៥លាននាក់

ភ្នំពេញ៖ គិតត្រឹមដំណាច់ឆ្នាំ ២០២៤ រាជរដ្ឋាភិបាលចំណាយថវិកាប្រមាណ ២៨៥ លានដុល្លារ ក្នុងកម្មវិធីជាតិជំនួយសង្គមចំនួន៨ ជួយដល់ពលរដ្ឋជាង ៤,៨លាននាក់ ដើម្បីបន្តជួយគាំទ្រជីវភាពគ្រួសារ និងចាកចេញពីភាពក្រីក្រ។

រាជរដ្ឋាភិបាលបានចំណាយថវិកាប្រមាណ ២៨៥លានដុល្លារ ក្នុងកម្មវិធីជាតិជំនួយសង្គម ទាំងក្នុងកញ្ចប់គ្រួសារ មានរួមបញ្ជូល ការឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ, អាហារូបករណ៍សម្រាប់សិស្សក្រីក្រថ្នាក់បឋមសិក្សា និងមធ្យមសិក្សាប្រមាណ, ឧបត្ថម្ភសាច់ប្រាក់ជូនជនមានពិការភាពជិត, ឧបត្ថម្ភសាច់ប្រាក់ជូនជនចាស់ជរា (អាយុ ៦០ឆ្នាំឡើង)។

ក្នុងប្រព័ន្ធជំនួយសង្គម រដ្ឋក៏បានផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍, បណ្តុះបណ្តាលវិជ្ជាជីវៈសម្រាប់យុវជនមកពីគ្រួសារក្រីក្រ និងងាយរងហានិភ័យ ជាមួយនឹងប្រាក់ឧបត្ថម្ភប្រចាំខែចំនួន ២៨ម៉ឺនរៀល ក្នុងមួយខែសិក្សា សម្រាប់រយៈពេល ៤ខែ, មូលនិធិសមធម៌សុខាភិបាល និងការឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ឆ្នាំ សម្រាប់សមាជិក ប.ស.ស. ។

គួរបញ្ជាក់ថា រដ្ឋបានចំណាយថវិកា ១៣៧លានដុល្លារ សម្រាប់កម្មវិធីជាតិជំនួយសង្គមក្នុងកញ្ចប់គ្រួសារ ហើយក្នុងឆ្នាំ២០២៥ គ្រោងថវិកាចំនួន១៥៥,៨ លានដុល្លារដើម្បីបន្តកម្មវិធី៕