ក្រសួងការបរទេស ជ្រើសរើសមន្ត្រីជាប់កិច្ចសន្យាចំនួន ៥០នាក់ ដើម្បីចូលបម្រើការងារ

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី ១១ ខែកុម្ភៈ បានចេញសេចក្តីជូនដំណឹង ស្តីពី ត្រូវការជ្រើសរើសមន្ត្រីជាប់កិច្ចសន្យា ចំនួន ៥០នាក់ ដើម្បីមកបម្រើការងារពេញម៉ោង ក្នុងអគ្គនាយកដ្ឋាន និងនាយកដ្ឋាន។

យោងតាមក្រសួងការបរទេស និងសហប្រតិបត្តិការអន្តរជាតិ បានចេញសេចក្តីជូនដំណឹងថា ក្រសួងត្រូវការជ្រើសរើសមន្ត្រីជាប់កិច្ចសន្យា ចំនួន ៥០នាក់ ដើម្បីមកបម្រើការងារពេញម៉ោង ក្នុងអគ្គនាយកដ្ឋាន និងនាយកដ្ឋាន រួមមាន៖ អគ្គនាយកដ្ឋានអាស៊ាន ចំនួន ១០នាក់, អគ្គនាយកដ្ឋានកិច្ចការច្បាប់ កុងស៊ុល និងព្រំដែន ចំនួន ០៦នាក់, អគ្គនាយកដ្ឋានអាស៊ី-ប៉ាស៊ីហ្វិក ចំនួន ០៨នាក់, អគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈិមបូព៌ា (ភាសាអង់គ្លេស/ភាសាបារាំង)ចំនួន ០៩នាក់, អគ្គនាយកដ្ឋានសហប្រតិបត្តិការអន្តរជាតិ ចំនួន ០៤នាក់, អគ្គលេខាធិការដ្ឋាន ចំនួន ០៦នាក់, នាយកដ្ឋានព័ត៌មាន ចំនួន ០៣នាក់, នាយកដ្ឋានគោលនយោបាយ ការទូតសេដ្ឋកិច្ច និងផែនការយុទ្ធសាស្ត្រ ចំនួន ០៤នាក់។

ចំពោះ លក្ខខណ្ឌជ្រើសរើស បេក្ខជន បេក្ខនារី ត្រូវមានលក្ខណៈសម្បត្តិ ដូចជា មានសញ្ជាតិខ្មែរ និងអាយុមិនលើស ៤០ឆ្នាំ សម្រាប់បរិញ្ញាបត្រ និងត្រូវមានជំនាញ ភាសាអង់គ្លេស នីតិសាស្ត្រ នីតិសមុទ្រ ទំនាក់ទំនងអន្តរជាតិ សេដ្ឋកិច្ច វិទ្យាសាស្ត្រនយោបាយ នយោបាយសាធារណៈ ហិរញ្ញវត្ថុ គណនេយ្យ សារព័ត៌មាន ព័ត៌មានវិទ្យា ទេសចរណ៍ ពាណិជ្ជកម្ម ភាសាឡាវ និងភាសាថៃ។

ក្រសួងការបរទេស បានបញ្ជាកថា ការទទួលពាក្យ នឹងត្រូវចាប់ផ្តើមពីថ្ងៃផ្សាយដំណឹងនេះ រហូតដល់ថ្ងៃទី២១ ខែកុម្ភៈ ឆ្នាំ២០២៥ ត្រឹមម៉ោង ១៧៖០០នាទី នៅនាយកដ្ឋានបុគ្គលិក នៃក្រសួងការបរទេស និងសហប្រតិបត្តិការអន្តរជាតិ ដែលមានអាសយដ្ឋាន៖ អគារលេខ ៣ វិថី សម្តេច ហ៊ុន សែន សង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ៕