.png?1741682398)
សៀមរាប៖ មន្ត្រីអាជ្ញាធរជាតិអប្សរា បានចុះមុជទឹករាវរកសម្ភារជូនភ្ញៀវទេសចរជាតិ-អន្តរជាតិ ដែលមិនបានប្រយ័ត្នធ្វើអោយធ្លាក់សម្ភារចូលទៅក្នុងទឹក ខណៈពេលកំពុងតែដើរទស្សនាលើស្ពាន នៅប្រាសាទនាគព័ន្ធ។
បើតាមមន្ត្រីអាជ្ញាធរជាតិអប្សរា បានឲ្យដឹងថា នៅថ្ងៃទី៤ ខែកុម្ភះ ឆ្នាំ២០២៥ វេលាម៉ោង ១០:៥៩នាទី ភ្ញៀវទេសចរជាតិមួយក្រុម មកពីខេត្តរតនគីរី បានកំពុងតែដើរទស្សនាលើស្ពាន នៅប្រាសាទនាគព័ន្ធ ដោយមិនបានប្រយ័ត្នធ្វើអោយធ្លាក់សោរឡានចូលទៅក្នុងទឹក ខណៈពេលកំពុងតែដើរទស្សនាលើស្ពាន ភ្លាមៗនោះ ក្រុមភ្នាក់ងារទេសចរបានសហការជាមួយក្រុមភ្នាក់ងារសណ្តាប់ធ្នាប់ ដោយភ្នាក់ងារទេសចរបានចុះទឹក ដើម្បីធ្វើការរាវស្វែងរករហូតឃើញ និងបានប្រគល់ជូនភ្ញៀវវិញ។
គួរបញ្ជាក់ថា កាលពីថ្ងៃទី ៣០ ខែមករា ឆ្នាំ២០២៥ មានភ្ញៀវទេសចរអន្តរជាតិម្នាក់ បានធ្វើឲ្យធ្លាក់ទូរសព្ទដៃមួយគ្រឿងចូលក្នុងទឹក ហើយត្រូវបានក្រុមភ្នាក់ងារសណ្តាប់ធ្នាប់ នៃអាជ្ញាធរជាតិអប្សរា ចុះមុជទឹករាវរកឃើញនឹងបានប្រគល់ជូនម្ចាស់ដើមផងដែរ៕
