ភ្នំពេញ៖ ក្នុងខែមករា ឆ្នាំ២០២៥នេះ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរមានសរុបចំនួន ១៤៦,១៤០ នាក់ កើនឡើង២៦.៤៩ ភាគរយ បើធៀបរយៈពេលដូចគ្នាក្នុងឆ្នាំ២០២៤។ ក្នុងនោះភ្ញៀវទេសចរអាម៉េរិក ឈរលំដាប់លេខរៀងទី១ ក្នុងការមកទស្សនារមណីយដ្ឋានអង្គរ ដែលមានចំនួន ១៦,៧៩០ នាក់ កើនឡើង ២៨.១៧ ភាគរយ បើធៀបរយៈពេលដូចគ្នាក្នុងឆ្នាំ២០២៤។
របាយការណ៍របស់គ្រឹះស្ថានអង្គរ ផ្ដល់មកកាន់ ស៊ីស៊ីថាមស៍ បានគូសបញ្ជាក់ថា ភ្ញៀវទេសចរបរទេសដែលបានទិញសំបុត្រចូលទស្សនារមណីយដ្ឋានអង្គរច្រើនជាងគេមានដូចជា៖ សហរដ្ឋអាម៉េរិក ១៦,៧៩០ នាក់, កូរ៉េខាងត្បូង ១៤,៦២២ នាក់, ចិន ១៤,៤៩១ នាក់, បារាំង ១២,៩៧៤ នាក់, អង់គ្លេស ១០,៥៥៨ នាក់។
គួរបញ្ជាក់ថា ក្នុងឆ្នាំ២០២៤ ភ្ញៀវទេសចរទិញសំបុត្រចូលទស្សនារមណីយដ្ឋានអង្គរ គឺមានចំនួនសរុប ១,០២៣,៦៨៨ នាក់ ដោយគិតជាទឹកប្រាក់មានចំនួន ៤៧,៨២៦,៩៨១ ដុល្លារ កើនឡើង ១២៨.៥៧% បើធៀបរយៈពេលដូចគ្នាក្នុងឆ្នាំ២០២៣។ ចំណូលបានច្រើនជាងគេពីការលក់សំបុត្រចូលទស្សនារមណីយដ្ឋានអង្គរ គឺស្ថិតក្នុង ខែវិច្ឆិកា អាចរកចំណូលបានរហូតដល់ ៥,៩២០,៨៧២ ដុល្លារ បន្ទាប់មកគឺខែធ្នូ ទទួលបានទឹកប្រាក់ចំនួន ៥,៩១៨,១៤៨ ដុល្លារ បន្ទាប់មកគឺខែផ្សេងៗទៀត ទទួលបានទឹកប្រាក់ចំនួន ៥,៧៣៦,៦២១ ដុល្លារ៕
