កំពង់ធំ៖ ស្ពានអូរមៀន ខេត្តកំពង់ធំ ត្រូវបានបិទផ្អាកចរាចរចំពោះយានយន្តដឹកទំនិញគ្រប់ប្រភេទ ដោយអនុញ្ញាតឲ្យតែយានយន្តធន់តូចលក្ខណៈគ្រួសារ និងទោចក្រយានយន្តឆ្លងកាត់តែប៉ុណ្ណោះ។ នេះបើតាមសេចក្តីជូនដំណឹងរបស់រដ្ឋបាលខេត្តកំពង់ធំនាថ្ងៃទី៣ ខែកុម្ភៈ ឆ្នាំ២០២៥។
ស្ពានអូរមៀន ស្ថិតនៅចំនុចភូមិសមរម្យ ឃុំមានជ័យ ស្រុកសណ្តាន់ ខេត្តកំពង់ធំ គឺជាហេដ្ឋារចនាសម្ព័នដ៏មានសារៈសំខាន់ សម្រាប់តភ្ជាប់ពីស្រុកប្រាសាទសំបូរ ទៅស្រុកសណ្តាន់។ ស្ពាននេះត្រូវបានប្រកាសបិទចរាចរ ក្រោយក្រុមការងារបច្ចេកទេស បានពិនិត្យឃើញថា មានស្ថានភាពទ្រុតទ្រោម និងមានផ្នែកខ្លះត្រូវបានបាក់ស្រុត ដោយមិនអាចទ្រាំទ្រនឹងទម្ងន់យានយន្តដឹកទំនិញគ្រប់ប្រភេទឆ្លងកាត់បានទេ។
ដើម្បីរក្សាសុវត្ថិភាពជូនប្រជាពលរដ្ឋដែលឆ្លងកាត់ស្ពាននេះ រដ្ឋបាលខេត្ត សូមធ្វើការបិទចរាចរចំពោះយានយន្តដឹកទំនិញគ្រប់ប្រភេទ ដោយអនុញ្ញាតឲ្យតែយានយន្តធន់តូចលក្ខណៈគ្រួសារ និងទោចក្រយានយន្តឆ្លងកាត់តែប៉ុណ្ណោះ ចាប់ពីថ្ងៃជូនដំណឹងតទៅរហូតដល់មានសេចក្តីជូនដំណឹងជាថ្មី៕
