ភ្នំពេញ៖ ក្នុងរយៈពេល១ឆ្នាំពេញនៃឆ្នាំ២០២៤ កម្ពុជាទទួលបានភ្ញៀវទេសចរបរទេសចំនួន ៦,៧០០,១២៥ នាក់ កើនឡើងចំនួន ២២.៩ ភាគរយ បើធៀបរយៈពេលដូចគ្នាក្នុងឆ្នាំ២០២៣។ ក្នុងនោះភ្ញៀវទេសចរបរទេសដែលមកកម្ពុជាច្រើនជាងគេគឺ ថៃ វៀតណាម ចិន និងឡាវជាដើម។ នេះបើតាមរបាយការណ៍របស់ក្រសួងទេសចរណ៍។
បើតាមរបាយការណ៍ ចាប់ពីខែមករា-ខែធ្នូ ឆ្នាំ២០២៤ ភ្ញៀវទេសចរបរទេសដែលចូលមកកម្ពុជាមានប្រមាណជាង ៦,៧ លាននាក់ ក្នុងនោះភ្ញៀវទេសចរដែលចូលមកតាមរយៈជើងហោះហើរមានចំនួន ២,៣៩៦,៩៣៧ នាក់ កើនឡើង ២៨.៤ ភាគរយ បើធៀបរយៈពេលដូចគ្នាក្នុងឆ្នាំ២០២៣ តាមផ្លូវគោកមានចំនួន ៤,២១៨,៨១១ នាក់ កើនឡើង ១៩.៨ភាគរយ និងតាមផ្លូវទឹកមានចំនួន ៨៤,៣៧៧ នាក់ កើនឡើង ២៧.៣ ភាគរយ។
របាយការណ៍បញ្ជាក់ថា ទីផ្សារទាំង១០ដែលកម្ពុជាទទួលបានភ្ញៀវទេសចរច្រើនជាងគេមានដូចជា៖ ថៃ ២,១៤៦,៦៧៤ នាក់, វៀតណាម ១,៣៤០,៥៨៧ នាក់, ចិន ៨៤៨,៩៥២ នាក់, ឡាវ ៣៣៤,៤៤៨ នាក់, សហរដ្ឋអាម៉េរិក ២១៤,៥២៩ នាក់, សាធារណរដ្ឋកូរ៉េ ១៩២,៣០៥ នាក់, ឥណ្ឌូវនេស៊ី ១៦៦,៧៩៥ នាក់, បារាំង ១៣១,៧៣៨ នាក់, អង់គ្លេស ១១៥,១៤៨ នាក់, ជប៉ុន ១១២,៧១៨ នាក់៕
