ភ្នំពេញ៖ យ៉ាងហោចណាស់មានគម្រោងវិនិយោគថ្មីចំនួន ១៧ គម្រោង ត្រូវបានក្រុមប្រឹក្សាអភិវឌ្ឍន៍កម្ពុជាបើកកិច្ចប្រជុំពិនិត្យ ដើម្បីដំណើរការគម្រោងនៅក្នុងប្រទេសកម្ពុជា។ជាគម្រោងដំបូងសម្រាប់ឆ្នាំ២០២៥ មានទុនវិនិយោគសរុបប្រមាណ ១៥០លានដុល្លារអាម៉េរិក, អាចបង្កើតការងារបានចំនួនប្រមាណ ៩ពាន់កន្លែង។
កិច្ចប្រជុំពិនិត្យគម្រោងវិនិយោគទាំង១៧ គឺដឹកនាំដោយផ្ទាល់ពីលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការអញ្ជើញចូលរួមពីសំណាក់តំណាងក្រសួង ស្ថាប័ន និងរដ្ឋបាលរាជធានី ខេត្តពាក់ព័ន្ធ។
បើតាមក្រុមប្រឹក្សាអភិវឌ្ឍន៍កម្ពុជា គម្រោងវិនិយោគទាំង១៧នេះ មានទុនវិនិយោគសរុបប្រមាណ ១៥០លានដុល្លារអាម៉េរិក, អាចបង្កើតការងារបានចំនួនប្រមាណ ៩ពាន់កន្លែង និង មានមុខសញ្ញាវិនិយោគក្នុងវិស័យកសិកម្ម និងកសិ-ឧស្សាហកម្មចំនួន ១គម្រោង (បង្កើតរោងចក្រកែច្នៃជ័រកៅស៊ូ) និង ក្នុងវិស័យឧស្សាហកម្មចំនួន ១៦គម្រោង (បង្កើតរោងចក្រកែច្នៃលោហធាតុ, ផ្គុំដំឡើងគ្រឿងអេឡិចត្រូនិក, ផលិតអំពូលភ្លើងនិងបរិក្ខារអគ្គិសនី, ផលិតគ្រឿងសង្ហារិម, ផលិតផ្កានិងផ្លែឈើសិប្បនិម្មិត, ផលិតឧបករណ៍ជាងនិងឧបករណ៍ប្រើប្រាស់ក្នុងយានដ្ឋាន, ផលិតចង្ក្រាននិងឡចម្អិន, ផលិតសម្ភារៈវេចខ្ចប់, ផលិតសម្ភារៈសម្រាប់បោះជំរុំ, ខារអំបោះ, បោកគក់និងជ្រលក់ពណ៌) ។
របាយការណ៍ដដែល គម្រោងទាំងអស់នេះ គឺកំពុងត្រៀមរៀបចំបោះទីតាំងវិនិយោគនៅ រាជធានីភ្នំពេញ, ខេត្តកំពង់ស្ពឺ, ខេត្តតាកែវ, ខេត្តត្បូងឃ្មុំ, ខេត្តស្វាយរៀង, ខេត្តកំពង់ឆ្នាំង និង ខេត្តបន្ទាយមានជ័យ។
គួរបញ្ជាក់ថា នៅឆ្នាំ២០២៤កន្លងទៅ ប្រទេសកម្ពុជាទទួលបានគម្រោងវិនិយោគ ៤១៤ កើនឡើងជាង ៥០% បើធៀបនឹងឆ្នាំ២០២៣។ បើគិតជាទុនវិនិយោគសរុបក្នុងឆ្នាំ២០២៤ មានប្រមាណ៦,៩ពាន់លានដុល្លារ ដែលក្រុមប្រឹក្សា CDC ថាអាចបង្កើតការងារបានប្រមាណជិត ៣២ ម៉ឺនកន្លែង។
នៅក្នុងឆ្នាំ២០២៤ ការវិនិយោគមកពីចិនស្ថិតនៅលំដាប់លេខរៀងទី១ ស្មើប្រមាណ ៥០% នៃផលទុនសរុប អ្នកវិនិយោគក្នុងប្រទេសកម្ពុជាផ្ទាល់ស្ថិតនៅលំដាប់លេខរៀងទី២ ស្មើនឹង៣៤% វៀតណាមស្ថិតនៅលំដាប់លេខរៀងទី៣ ស្មើនឹង ៨%។ ប្រទេសសិង្ហបុរី ឈរលេខរៀងទី៤ ស្មើនឹង៣,៨%។
វិស័យឧស្សាហកម្មនៅតែបន្តជាវិស័យលេចធ្លោជាងគេ ដោយបានស្រូបទាញគម្រោងវិនិយោគចំនួន ៣៩៤ ស្មើនឹងប្រមាណ ៩៥% នៃចំនួនគម្រោងវិនិយោគសរុប ខណៈទុនវិនិយោគក្នុងវិស័យនេះមានប្រមាណ ៤,៨ ពាន់លានដុល្លារអាមេរិក ដែលរួមចំណែក ៦៩% នៃទុនវិនិយោគសរុប និងមានកំណើនដល់ទៅប្រមាណ ១១០% ធៀបនឹងឆ្នាំ២០២៣៕
