ភ្នំពេញ៖ គម្រោងវិនិយោគដែលក្រុមប្រឹក្សាអភិវឌ្ឍន៍កម្ពុជា(ក.អ.ក ឬ CDC) បានអនុម័តឱ្យវិនិយោគនៅកម្ពុជា បានកើនដល់ចំនួន ៤១៤ គម្រោង ក្នុងឆ្នាំ២០២៤ ខណៈគម្រោងវិនិយោគនៅឆ្នាំ២០២៣ មានត្រឹម២៦៨គម្រោង។ ស្ថិតិនេះត្រូបានបង្ហាញក្នុងកិច្ចប្រជុំផ្លូវការលើកទី១ របស់ក្រុមប្រឹក្សាអភិវឌ្ឍន៍កម្ពុជា ក្រោមកិច្ចដឹកនាំដ៏ខ្ពង់ខ្ពស់របស់ សម្តេច ហ៊ុន ម៉ាណែត នាយករដ្ឋមន្ត្រី នៃកម្ពុជា និងជាប្រធាន ក.អ.ក នៅថ្ងៃទី២០ ខែធ្នូ ឆ្នាំ២០២៤។
សម្ដេច ហ៊ុន ម៉ាណែត បានដឹកនាំកិច្ចប្រជុំក្រុមប្រឹក្សាអភិវឌ្ឍន៍កម្ពុជាជាលើកដំបូង បន្ទាប់ពីរាជរដ្ឋាភិបាលនីតិកាលទី៧ ដំណើរការ ក្នុងនាមជាប្រមុខរាជរដ្ឋាភិបាលផង និងជាប្រធានក្រុមប្រឹក្សាអភិវឌ្ឍន៍កម្ពុជាផង។ ជាលទ្ធផលស្ថិតិគម្រោងវិនិយោគដែលបានអនុម័ត ដោយ ក.អ.ក. មានចំនួន ២៦៨គម្រោង ឆ្នាំ២០២៣ កើនដល់ចំនួន ៤១៤គម្រោងឆ្នាំ២០២៤ ស្មើនឹងកើនឡើង ១៤៦គម្រោង ស្មើនឹង ៥៤%។ គិតជាទុនវិនិយោគមានចំនួន ៤,៩២៧ លានដុល្លារ ឆ្នាំ២០២៣ កើនដល់ចំនួន ៦,៩០០លានដុល្លារ ស្មើនឹងកើនឡើង ១,៩៧៣ លានដុល្លារ ស្មើនឹង៤០%។
គួរបញ្ជាក់ថា ក្រុមប្រឹក្សាអភិវឌ្ឍន៍កម្ពុជា ហៅកាត់ថា ក.អ.ក. ឬ CDC ត្រូវបានបង្កើតឡើងនៅថ្ងៃ៥ ខែសីហា ឆ្នាំ១៩៩៤ ដែលមានបេសកកម្មក្នុងការទាក់ទាញវិនិយោគមកកម្ពុជា។ កិច្ចប្រជុំផ្លូវការលើកទី១ របស់ក្រុមប្រឹក្សាអភិវឌ្ឍន៍កម្ពុជា ត្រូវបានដឹកនាំដោយសម្ដេច ហ៊ុន ម៉ាណែត នាយករដ្ឋមន្ត្រី នៃកម្ពុជា និងជាប្រធាន ក.អ.ក. ដោយមានការចូលរួមពី ឧបនាយករដ្ឋមន្ត្រី អនុប្រធានទី១ ក.អ.ក. ទេសរដ្ឋមន្ត្រី អនុប្រធានទី២ ក.អ.ក. រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការ អគ្គលេខាធិការរង ជាថ្នាក់ដឹកនាំក.អ.ក. សរុបចំនួន ២៤រូប៕
