តុលាការឃុំខ្លួនបណ្ដោះអាសន្នលោក កន សុខកាយ អតីតអភិបាលស្រុកល្វាឯម

ភ្នំពេញ៖ តុលាការសម្រេចឃុំខ្លួនបណ្ដោះអាសន្ន ឈ្មោះ កន សុខកាយ ករណីយកលុយ ៣០ម៉ឺនដុល្លារ រត់ការដើម្បីធ្វើជា អភិបាលក្រុងអរិយក្សត្រ។ការសម្រេចនេះ គឺធ្វើឡើងក្រោយពីតុលាការ បានសួរចម្លើយជនត្រូវចោទ និងពិនិត្យភស្តុតាង។នេះបើយោងតាមសេចក្តីប្រកាសព័ត៌មានរបស់តុលាការសាលាដំបូងរាជធានីភ្នំពេញ។

យោងតាមសេចក្តីប្រកាសព័ត៌មាន បានគូសបញ្ជាក់ថា អតីតអភិបាលស្រុកល្វាឯម ខេត្តកណ្តាល លោក កន សុខកាយ ត្រូវបានតុលាការចេញដីកាឃុំខ្លួនដាក់ពន្ធនាគារ ពាក់ព័ន្ធរឿងយកលុយ៣០ម៉ឺនដុល្លារ រត់ការចង់ធ្វើជាអភិបាលក្រុងអរិយក្សត្រ តាមរយៈលោក លី សាម៉េត លោក ដួង ដារ៉ា និងលោក ឡាច សំរោង។

តាមសេចក្ដីប្រកាសព័ត៌មាន បានបញ្ជាក់ថា សាលាដំបូងរាជធានីភ្នំពេញ បានចាត់ការលើសំណុំរឿងព្រហ្មទណ្ឌ ទាក់ទិននឹងករណីប៉ុនប៉ងក្នុងបទសូកប៉ាន់ ដែលមានជនត្រូវចោទមានខ្លួនឈ្មោះ សុខកាយ ភេទប្រុស អាយុ៤២ឆ្នាំ ត្រូវបានចោទប្រកាន់ពីបទ «ប៉ុនប៉ងក្នុងបទសូកប៉ាន់» ព្រមទាំងជនត្រូវចោទចំនួន៣នាក់ទៀត គឺ ឈ្មោះ លី សាម៉េត ភេទប្រុស អាយុ៧១ឆ្នាំ (កំពុងឃុំខ្លួននៅ ពន្ធនាគារ), ឈ្មោះ ដួង តារា ភេទប្រុស អាយុ ៥៦ឆ្នាំ (កំពុងឃុំខ្លួននៅពន្ធនាគារ) និងឈ្មោះ ឡាច សំរោង ភេទប្រុស អាយុ៥៥ឆ្នាំ កំពុងគេចខ្លួន ត្រូវបានចោទប្រកាន់ពីបទប៉ុនប៉ងក្នុងបទសូកប៉ាន់ ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២២ បទល្មើសព្រហ្មទណ្ឌដែលមានចែង និងផ្តន្ទាទោសតាមមាត ២៧ និងមាត្រា ៦០៥ ក្រមព្រហ្មទណ្ឌ នៃព្រះរាជាណាចក្រកម្ពុជា និងមាត្រា៣២ នៃច្បាប់ស្ដីពីការប្រឆាំង អំពើពុករលួយ។

អ្នកនាំពាក្យសាលាដំបូងរាជធានីភ្នំពេញ បានបញ្ជាក់ថា ដំណើររឿងដែលនាំឱ្យមានការ ចោទប្រកាន់នេះ គឺឈ្មោះ កន សុខកាយ បានយកប្រាក់ចំនួន ៣០០ ០០០ដុល្លារទៅឱ្យឈ្មោះ លី សាម៉េត, ឈោ្មះ ដួង តារា និងឈ្មោះ ឡាច សំរោង ដោយមានចេតនាដើម្បីសូកប៉ាន់ក្នុងគោលបំណងទទួលបានតំណែងជាអភិបាលក្រុងអរិយក្សត្រ។

បន្ទាប់ពីបានសួរចម្លើយជនត្រូវចោទ និងពិនិត្យភស្តុតាង ចៅក្រមស៊ើបសួរសម្រេចឃុំខ្លួនបណ្តោះអាសន្ន លើជនត្រូវចោទឈ្មោះ កន សុខកាយ ដើម្បីបន្តការស៊ើបសួរតាមនីតិវិធីច្បាប់៕