ភ្នំពេញ៖ ក្រសួងប្រៃសណីយ៍ និងទូរគមនាគមន៍ បានប្រគល់កំព្យូទ័រចំនួន ១១៦គ្រឿង និងចែកវិញ្ញាបនបត្របញ្ជាក់ការចូលរួមវគ្គបណ្តុះបណ្តាលឌីជីថលជូនដល់មន្រ្តីតុលាការកំពូលនិងមហាអយ្យការអមតុលាការកំពូល នាថ្ងៃទី៣០ ខែតុលា ឆ្នាំ ២០២៤ ដើម្បីជំរុញការធ្វើបរិវត្តកម្មឌីជីថល និងក្លាយជាស្ថាប័នឌីជីថល។
យោងតាមការផ្សាយរបស់ក្រសួងប្រៃសណីយ៍ និងទូរគមនាគមន៍ បានឲ្យដឹងថា ក្រសួងបានប្រគល់កំព្យូទ័រចំនួន ១១៦គ្រឿង និងចែកវិញ្ញាបនបត្របញ្ជាក់ការចូលរួមវគ្គបណ្តុះបណ្តាលឌីជីថល លើជំនាញសន្តិសុខសាយប័រនិងអក្ខរកម្មទិន្នន័យ ជូនដល់មន្រ្តីតុលាការកំពូលនិងមហាអយ្យការអមតុលាការកំពូល នាថ្ងៃទី៣០ ខែតុលា ឆ្នាំ ២០២៤ ដើម្បីធ្វើបរិវត្តកម្មឌីជីថល និងក្លាយជាស្ថាប័នឌីជីថល ព្រមទាំងលើកកម្ពស់ផ្តល់សេវាយុត្តិធម៌ ប្រកបដោយគុណភាព ងាយស្រួល សុក្រឹតភាព និងតម្លាភាពផងដែរ។
គួរបញ្ជាក់ថា ជាជំហានបន្ទាប់ ស្ថាប័នទាំងពីរនឹងបន្តសហការយ៉ាងជិតស្និទ្ធជាមួយគ្នា ដូចជាដាក់ឱ្យប្រើថ្នាលនិងកម្មវិធីរដ្ឋាភិបាលឌីជីថល ការអភិវឌ្ឍនិងប្រើប្រាស់កម្មវិធីគ្រប់គ្រងសំណុំរឿង រួមទាំងបណ្តុះបណ្តាលនិងជំរុញ ការចាប់យកឌីជីថលរបស់មន្ត្រីនៃតុលាការកំពូល ឲ្យកាន់តែមានគុណភាពល្អ និងប្រសិទ្ធភាពនៃការផ្តល់នូវសេវាយុត្តិធម៌សម្រាប់សង្គមជាតិ៕
