ភ្នំពេញ៖ក្រសួងវប្បធម៌ និងវិចិត្រសិល្បៈ នៅថ្ងៃទី ២៥ តុលានេះ បានប្រកាសដំណើរការរៀបចំមហោស្រពល្ខោនបាសាក់ទូទាំងប្រទេស ឆ្នាំ២០២៤ ក្រោមប្រធានបទ «ចង្កឹះមួយបាច់» រយៈពេល៣ថ្ងៃ ចាប់ពីថ្ងៃទី២៥ ដល់ថ្ងៃទី ២៧ ខែតុលា ឆ្នាំ២០២៤។ជាមហោស្រព រៀបចំឡើងដើម្បីថែរក្សាការពារ លើកស្ទួយ អភិរក្សតម្លៃសិល្បៈវប្បធម៌ប្រពៃណីជាតិ និងអត្តសញ្ញាណជាតិ។
ក្រសួងវប្បធម៌ បានគូសបញ្ជាក់ថា ការលើកយកប្រធានបទ “ចង្កឹះមួយបាច់” គឺពិតជាមានសារសំខាន់ណាស់ ក្នុងបរិការណ៍នៃពិភពលោក កំពុងប្រឈមនឹងភាពតានតឹងកាន់តែស្រួចស្រាល់ សំដៅលើកកម្ពស់ការយល់ដឹងបន្ថែមទៀតអំពីអត្ថន័យនៃ “សន្តិភាព” ឱ្យកាន់តែទូលំទូលាយ ក្នុងគោលបំណងពង្រឹងសាមគ្គីភាព ឯកភាពជាតិ និងរួមគ្នាថែរក្សាការពារឱ្យបានគង់វង្សនូវសុខសន្តិភាពយូរអង្វែង ដើម្បីភាពសុខសាន្តរបស់ប្រជាជន និងការអភិវឌ្ឍរីកចម្រើន ក្នុងសង្គមជាតិ។
ក្រសួងវប្បធម៌ ចាត់ទុកថា ការរៀបចំ មហោស្រពល្ខោនបាសាក់ នេះ គឺជាព្រឹត្តិការណ៍វប្បធម៌មួយមាន សារៈសំខាន់ ក្នុងការរួមចំណែកដល់ការអភិរក្ស និងលើកស្ទួយសិល្បៈល្ខោនបាសាក់ ដែលជាទម្រង់មរតកវប្បធម៌អរូបីដ៏ចំណាស់មួយរបស់កម្ពុជា និងជាសម្បត្តិបេតិកភណ្ឌវប្បធម៌អរូបីនៃមនុស្សជាតិ ឱ្យបានស្ថិតស្ថេរជាអមតៈក្នុងបេះដូងកូនខ្មែរគ្រប់រូប។ មួយវិញទៀត មហោស្រពនេះក៏ជាការ ផ្តល់នូវ កាលានុវត្តភាព ក្នុងការរៀនសូត្រពីគ្នាទៅវិញទៅមក ដើម្បីពង្រឹងសមត្ថភាព និងគុណភាពក្នុងអាជីពសិល្បករ សិល្បការិនីល្ខោនបាសាក់ សំដៅអភិរក្សទម្រង់សិល្បៈល្ខោនបាសាក់ឱ្យបានគង់វង្ស ធានាការបន្តវេនទៅអ្នកជំនាន់ក្រោយ ព្រមទាំងអាចទាញយកអត្ថប្រយោជន៍ពីវិស័យនេះ ដើម្បីរួមចំណែកអភិវឌ្ឍន៍សេដ្ឋកិច្ចជាតិ និងបម្រើសេចក្តីត្រូវការរបស់មហាជន។
.png?1779094449)
