កំពង់ស្ពឺ៖ កម្លាំងអគ្គស្នងការដ្ឋាននគរបាលជាតិ នៅថ្ងៃទី ២៤ តុលាម្សិលមិញនេះ បានបើកប្រតិបត្តិការចុះបង្ក្រាបទីតាំងមួយកន្លែង ស្ថិតក្នុង ឃុំអង្គពពែល ស្រុកគងពិសី ខេត្តកំពង់ស្ពឺ និង បានចាប់ឃាត់ខ្លួនជនបរទេសជាច្រើននាក់។ជាប្រតិបត្តិការ ធ្វើឡើងក្រោយសង្ស័យថា ធ្វើទារុណកម្មលើបុគ្គលិកក្នុងទីតាំងនោះ។
យោងតាមស្នងការដ្ឋាននគរបាលខេត្ដកំពង់ស្ពឺ បានគូសបញ្ជាក់ថា នគរបាលកម្លាំជំនាញនៃអគ្គស្នងការដ្ឋាននគរបាលជាតិ បានចូលរួមសហការត្រួតពិនិត្យទីតាំងដែលមានការសង្ស័យថា ប្រព្រឹត្តល្មើសធ្វើទារុណកម្មលើជនបរទេសដែលបុគ្គលិកធ្វើការនៅផ្លូវជាតិលេខ៣ ចន្លោះគីឡូម៉ែត្រលេខ ៣២-៣៣ ស្ថិតក្នុងភូមិស្វាយទាប ឃុំអង្គពពេល ស្រុកគងពិសី ខេត្តកំពង់ស្ពឺ ។
បើតាមរូបភាព ក្នុងប្រតិបត្តិការនោះ មានការចុះបង្ក្រាប និង ចាប់ខ្លួននូវមនុស្សជាច្រើននាក់ភាគច្រើនជាជនបរទេស។លោកឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ បានថ្លែងប្រាប់ ស៊ីស៊ីថាមស៍ នៅព្រឹកនេះថា ករណីនេះកំពុងស្ថិតនៅក្នុងប្រតិបត្តិការស៉ើបអង្កេត ក្រោយស្រាវជ្រាវចប់នឹងមានរបាយការណ៍លម្អិលពីករណីនេះ។
គួរបញ្ជាក់ថា ក្នុងប្រតិបត្តិការទ្រង់ទ្រាយធំនេះ កម្លាំងនគរបាលជំនាញ ដឹកនាំផ្ទាល់ដោយលោកឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ ដោយមានការបញ្ជាពីនាយឧត្តមសេនីយ៍ ស ថេត អគ្គស្នងការនគរបាលជាតិ ព្រមទាំងមានការចូលរួមពីកម្លាំងអាវុធហត្ថ ព្រមទាំងសមត្ថកិច្ចពាក់ព័ន្ធ៕
