ភ្នំពេញ៖ គណៈកម្មការរៀបចំបុណ្យកឋិនទានដង្ហែមកវត្តខ្មែរក្រោម ដឹកនាំដោយសម្តេច ម៉ែន សំអន នៅថ្ងៃទី ២១ តុលាម្សិលមិញ បានដឹកនាំគណៈកម្មការរៀបចំអង្គកឋិនទានចុះពិនិត្យមើលទីតាំង ដែលអង្គកឋិនទានមហាសាមគ្គីគ្រួសារខ្មែរ គ្រោងនឹងដង្ហែចូលនៅថ្ងៃទី៤ ខែវិច្ឆិកា ឆ្នាំ២០២៤ ខាងមុខ។ក្នុងបេសកកម្មចុះពិនិត្យនោះ ក៏មានជួបជាមួយប្រជាពលរដ្ឋ និង ព្រះសង្ឃគង់នៅវត្តខ្មែរកម្ពុជាក្រោមផងដែរ។
បើគ្មានអ្វីប្រែប្រួលនោះទេ សម្តេច ហ៊ុន សែន ប្រធានគណបក្សប្រជាជនកម្ពុជា នឹងរៀបចំអង្គកឋិនទាន «មហាសាមគ្គីគ្រួសារខ្មែរ» ដង្ហែទៅកាន់វត្តពោធិគិរីវង្សារាម ហៅវត្តស្វាយសៀមថ្មី ខេត្តព្រះត្រពាំង នៅខ្មែរកម្ពុជាក្រោម នៅថ្ងៃទី ៤ ខែវិច្ចិកា ឆ្នាំ២០២៤ ខាងមុខ។ជាអង្គកឋិនទាននេះធ្វើឡើងដោយ គណបក្សប្រជាជន រាជរដ្ឋាភិបាល រដ្ឋសភា ព្រឹទ្ធសភា ស្ថាប័នព្រះសង្ឃទាំងពីរគណៈ និង ស្ថាប័នថ្នាក់ជាតិផ្សេងទៀត។
មុនកម្មវិធីចូលមកដល់ គណៈកម្មការរៀបចំបុណ្យកឋិនទានដង្ហែមកវត្តខ្មែរក្រោម ដឹកនាំដោយសម្តេច ម៉ែន សំអន បានអញ្ជើញដឹកនាំគណៈកម្មការរៀបចំអង្គកឋិនទានចុះពិនិត្យមើលទីតាំងវត្តស្វាយសៀមថ្មី ស្ថិតនៅភូមិស្វាយសៀម ឃុំង៉ាយស្វៀង ស្រុកថ្កូវ ខេត្តត្រាវិញ (ព្រះត្រពាំង) នៃសាធារណរដ្ឋសង្គមនិយមវៀតណាម ដើម្បីត្រៀមរៀបចំកម្មវិធី។
គួរបញ្ជាក់ថា ប្រមុខរាជរដ្ឋាភិបាលកម្ពុជា នៅថ្ងៃទី ២ តុលា កន្លងទៅ បានចេញសេចក្តីសម្រេចមួយ ស្តីពីការបង្កើតគណៈកម្មការរៀបចំ«អង្គកឋិនទាន»ដើម្បីដង្ហែទៅកាន់វត្តខ្មែរកម្ពុជាក្រោមដោយកម្មការនេះមានសមាសភាពចូលរួម ២២រូប និង មានសម្តេច ម៉ែន សំអន ជាប្រធាន។
សម្តេច ហ៊ុន សែន សង្កត់ធ្ងន់ថា "ខ្មែរលើ ខ្មែរកណ្តាល ខ្មែរក្រោម ជាខ្មែរតែមួយ ទើបយើងដាក់ឈ្មោះអង្គកឋិនទាននេះថា (អង្គកឋិនទាន មហាសាមគ្គីគ្រួសារខ្មែរ) ដែលបងប្អូនខ្មែរនៅគ្រប់ទីកន្លែង គ្រប់គណបក្សនយោបាយ គ្រប់និន្នាការនយោបាយ អាចចូលរួមបានទាំងអស់គ្នា"។
.jpg?1729564775)
