កម្ពុជាទទួលបានភ្ញៀវទេសចរអន្តរជាតិជិត៥លាននាក់ក្នុងរយៈពេល៩ខែឆ្នាំ២០២៤

ភ្នំពេញ៖ ក្នុងរយៈពេល៩ខែ ឆ្នាំ២០២៤នេះ កម្ពុជាទទួលបានភ្ញៀវទេសចរអន្តរជាតិសរុបចំនួន៤,៨០ លាននាក់ កើនឡើង ២២,២% ធៀបរយៈពេលដូចគ្នាឆ្នាំ២០២៣ ស្មើនឹង ៩៩,៧% នៃឆ្នាំ២០១៩។ នេះបើតាមរបាយការណ៍ដែលផ្តល់មកកាន់សារព័ត៌មានស៊ីស៊ីថាមស៍ដោយលោក តុប សុភ័ក្រ អ្នកនាំពាក្យក្រសួងទេសចរណ៍។

បើតាមរបាយការណ៍ រយៈពេល៩ខែនេះ បណ្ណដែលបានលក់ឱ្យទេសចរបរទេសចូលទស្សនាតំបន់រមណីយដ្ឋានអង្គរសរុបមានចំនួន ៦៩៩ ៨៥០ សន្លឹក កើនឡើង ២៩,៧% និងចំណូលសរុប ៣២ ៥២២ ៧៣០$ កើនឡើង ៣០,២%។

ទន្ទឹមនឹងនេះ រយៈពេល៩ខែនេះ កម្ពុជាទទួលបានភ្ញៀវទេសចរជាតិចំនួន ១២,១៦ លាននាក់ កើនឡើង ៩,៨%។ ទេសចរជាតិចេញក្រៅមានចំនួន ១,៣៦ លាននាក់ កើនឡើង ៣,២%។

ជើងហោះហើរអន្តរជាតិចូលកម្ពុជាសរុបមានចំនួន ១៨ ៤១៧ ជើង ក្នុងនោះ ៖ អាកាសយានដ្ឋានអន្តរជាតិភ្នំពេញ (PHN): ១៣ ៥១១ ជើង, អាកាសយានដ្ឋានអន្តរជាតិសៀមរាបអង្គរ (SAI): ៤ ៥២៨ ជើង, អាកាសយានដ្ឋានអន្តរជាតិព្រះសីហនុ (KOS): ៣៧៨ ជើង។ នេះបើតាមរបាយការណ៍៕