ភ្នំពេញ៖ នៅរយៈពេល៣ថ្ងៃ ពោលគឺចាប់ពីថ្ងៃទី ១ដល់ថ្ងៃទី ៣ ខែតុលា ឆ្នាំ ២០២៤ មានភ្ញៀវទេសចរប្រមាណជិត២លាននាក់ ដើរលេងកម្សាន្តក្នុងពិធីបុណ្យភ្ជុំបិណ្ឌ។ក្នុងនោះមានភ្ញៀវទេសចរជាតិជាង១លាន៧សែននាក់ និង ទេសចរអន្តរជាតិជាង៣ម៉ឺននាក់។
យោងតាមរបាយការណ៍របស់ក្រសួងទេសចរណ៍កម្ពុជា បានគូសបញ្ជាក់ថា ៣ថ្ងៃនៃពិធីបុណ្យភ្ជុំបិណ្ឌនេះ ភ្ញៀវទេសចរក្នុងស្រុក ១,៧៤៨,៩៨៦នាក់ និង ភ្ញៀវទេសចរបរទេស ៣៧,០៩១នាក់។ក្នុងចំណោមខេត្តដែលទទួលបានភ្ញៀវទេសចរច្រើនជាងគេក្នុងអំឡុងពេលបុណ្យភ្ជុំបិណ្ឌនេះ ខេត្តបាត់ដំបង បានការលេចធ្លោជាខ្លាំង។ ខេត្តបាត់ដំបងបានស្វាគមន៍ភ្ញៀវទេសចរចំនួន ២១៥,៥៥៩នាក់ រួមទាំងភ្ញៀវទេសចរអន្តរជាតិចំនួន ៦២០នាក់ ដែលធ្វើឱ្យក្លាយជាចំណុចផ្តោតសំខាន់សម្រាប់ភ្ងៀវទេសចរទាំងក្នុងស្រុក និង បរទេស។
ខេត្តសៀមរាប ដែលល្បីល្បាញដោយប្រាសាទបុរាណ និង ប្រវត្តិសាស្ត្រសំខាន់ៗ បានទាក់ទាញភ្ញៀវទេសចរក្នុងស្រុកចំនួន ១៧៣,០០០នាក់ រួមជាមួយភ្ញៀវទេសចរអន្តរជាតិ ៧,៨៩៣នាក់។ ការរួមបញ្ចូលគ្នានៃការចាប់អារម្មណ៍របស់ប្រជាពលរដ្ទក្នុងស្រុក និងអន្តរជាតិនេះបានគូសបញ្ជាក់ពីភាពទាក់ទាញដែលកំពុងបន្តអភិវឌ្ឍរបស់ ខេត្តសៀមរាប ។
ខេត្តព្រះសីហនុ ក៏មានការចូលរួមយ៉ាងច្រើនផងដែរ ជាមួយនឹងភ្ញៀវទេសចរ ១៦៥,៥៩៥នាក់ និង ភ្ងៀវបរទេសចំនួន ៤,៩១៨នាក់ បានដើរកម្សាន្តឆ្លងកាត់ឆ្នេរដ៏ស្រស់ស្អាត និងអបអរពិធីបុណ្យភ្ជុំបិណ្ឌ។ខេត្តកំពង់ឆ្នាំង បានកត់សំគាល់ភ្ញៀវទេសចរក្នុងស្រុក ១៥៣,៧៩២នាក់ និងភ្ញៀវទេសចរបរទេស ១១៩នាក់ ខណៈ ខេត្តកំពត បានស្វាគមន៍ភ្ញៀវទេសចរ ១២៣,៣៣០នាក់ រួមទាំងភ្ងៀវបរទេស ៥៧៨នាក់។ តួលេខទាំងនេះបានឆ្លុះបញ្ចាំងពីការទាក់ទាញចម្រុះបែបនៅទូទាំងប្រទេសកម្ពុជា៕
