កែប៖សត្វល្មិច ឬហៅអណ្តើកសមុទ្រ ចំនួន៣ក្បាល កាលពីថ្ងៃទី ១៣ កញ្ញាកន្លងទៅ ត្រូវបានរៀបចំពិធីប្រលែងចូលសមុទ្រវិញ ស្ថិតភូមិកែប សង្កាត់កែប ក្រុងកែប ខេត្តកែប។ការលែងនេះ គឺដើម្បីបង្ហាញពី ការពារ ថែរក្សា និងបង្កើតអោយមានការគ្រប់គ្រងតំបន់អភិរក្សជលផលនៅក្នុងសមុទ្រ និង តាមបណ្តាកោះរបស់កម្ពុជា។
សត្វល្មិច ឬហៅអណ្តើកសមុទ្រ ចំនួន៣ក្បាល មានទម្ងន់សរុបជាង១០០គីឡូក្រាម ត្រូវបានប្រជានេសាទបានពីក្នុងសមុទ្រក្នុងខេត្តកែបរបស់ប្រទេសកម្ពុជា។លោក សោម ពិសិដ្ឋ អភិបាលខេត្តកែប មានប្រសាសន៍ថា ការលែងសត្វល្មិចនេះ ជាការបញ្ជាក់ពីការចូលរួមរវាងអ្នកនេសាទ និងមន្ត្រីជំនាញ ក្នុងការរួមសាមគ្គីគ្នា ដើម្បីថែរក្សាជីវចម្រុះដ៏កម្រក្នុងសមុទ្រខេត្តកែបអោយបានគង់វង្ស ។
អភិបាលខេត្តកែបរូបនេះ បានអំពាវនាវអោយប្រជាពលរដ្ឋទាំងអស់ ជាពិសេសប្រជាជានេសាទ ត្រូវបន្តចូលរួមថែរក្សាសត្វសមុទ្រ ពិសេសប្រភេទសត្វកម្រ ដូចជាត្រីដូហ្វីន ជ្រូកទឹក និង សត្វល្មិចនេះជាដើម អោយបានគង្សវង់ ក្រៅពីនេះត្រូវបង្កើនការការពារ អភិរក្ស ដោយប្រើប្រាស់ធនធានជលផលសមុទ្រប្រកបដោយនិរន្តរភាព ស្របតាមគោលនយោបាយចក្ខុវិស័យជលផលជាតិ និងរួមចំណែកលើកកម្ពស់ជីវភាពរស់នៅរបស់ពលរដ្ឋអោយកាន់តែរីកចម្រើន។
សូមបញ្ជាក់ថា កន្លងមកមន្ទីរពាក់ព័ន្ធ បានធ្វើការណែនាំអប់រំ ផ្សព្វផ្សាយ ដល់ប្រជានេសាទ អោយយល់ដឹងអំពីប្រយោជន៍ ក្នុងការថែរក្សា គាំពារ សត្វសមុទ្រ ដែលជាសត្វកម្រ ដូចជាប្រភេទសត្វល្មិចនេះជាដើម ដើម្បីបង្កើនការយល់ដឹងពីគុណប្រយោជន៍នៃសត្វសមុទ្រកម្រទាំងនេះ៕
.jpg?1726372457)
