ភ្នំពេញ៖រាជរដ្ឋាភិបាលកម្ពុជា នៅថ្ងៃទី ២៨ សីហានេះ បានចេញអនុក្រឹត្យ ស្តីពី ការបង្កើត«ក្រុងកំពង់សោម» នៃខេត្តព្រះសីហនុ។ក្នុងក្រុងថ្មីនេះ សម្រេចកាត់យកឃុំចំនួន៥ ពីស្រុកព្រៃនប់ គឺឃុំរាម ឃុំបិតត្រាំង ឃុំអូរឧកញ៉ាហេង ឃុំបឹងតាព្រហ្ម និង ឃុំអូរជ្រៅ។
យោងតាមអនុក្រឹត្យ ក្រុងកំពង់សោម មានសង្កាត់ចំនួន៥ និង ទីតាំងរដ្ឋបាល គឺស្ថិតនៅក្នុងសង្កាត់ រាម។ចំពោះក្រុមប្រឹក្សាស្រុកព្រៃនប់ និង គណៈអភិបាលស្រុកព្រៃនប់ នឹងត្រូវបន្តគ្រប់គ្រងឃុំទាំង ៥ដដែរ រហូតមានក្រុមប្រឹក្សា ក្រុងកំពង់សោម និង គណៈអភិបាលក្រុងថ្មីមកជំនួស។
គួររម្លឹកជូនថា កាលដើមឡើយ កម្ពុជាធ្លាប់មានការបង្កើតក្រុង «កំពង់សោម» តែត្រូវប្តូរនាមមកជា «ព្រះសីហនុ» នៅសម័យសង្គមរាស្ត្រនិយម។ក្រោយថ្ងៃរដ្ឋប្រហារ១៧ មេសា ឆ្នាំ១៩៧០ ក្នុងសម័យលន់ នល់ ក៏ត្រូវប្តូរមកជា ក្រុងកំពង់សោមវិញ។ក្រោយថ្ងៃរំដោះ៧មករា ឆ្នាំ១៩៧៩ ពោលគឺនាអំឡុងឆ្នាំ១៩៩៣ កំពង់សោម ក៏ត្រូវផ្លាស់ប្តូរឈ្មោះជាថ្មីទៀត មកដាក់ជា ព្រះសីហនុ វិញ។
តែជាការកត់សម្គាល់ បើទោះបីរបទនយោបាយស្រុកទេសផ្លាស់ប្តូរច្រើនលើកក្តី ចំពោះពលរដ្ឋសាមញ្ញ និង ជាភាសាអ្នកស្រុក ក្នុងជីវភាពប្រចាំថ្ងៃ គេច្រើននិយមនិយាយថា កំពង់សោមៗ តាមទម្លាប់។តែយ៉ាងណា ការបង្កើតទីក្រុងថ្មី ក្រុងកំពង់សោម នៅពេលនេះ អាចជាផែនការយុទ្ធសាស្ត្ររបស់រាជរដ្ឋាភិបាលកម្ពុជា ដើម្បីជំរុញខេត្តជាប់មាត់សមុទ្រនៃទិសនិរតីមួយនេះ ជា «ប៉ូលអភិវឌ្ឍន៍នៅតំបន់ឆ្នេរ» ពោលគឺជា តំបន់សេដ្ឋកិច្ចពិសេសគំរូ ជាមជ្ឈមណ្ឌលអន្តរជាតិ ជាទីផ្សារអាស៊ាន និង ទីផ្សារសកល៕
