ភ្នំពេញ៖ នៅរយៈពេលពេញ១ខែក្នុងខែ កក្កដា ឆ្នាំ២០២៤ អាកាសយានដ្ឋានអន្តរជាតិទាំង៣របស់ប្រទេសកម្ពុជា ទទួលបានជើងហោះហើរចំនួន៤,៧១៤ ជើង ជាចំនួនកើនឡើងបើធៀបជាមួយខែមិថុនាដែលជាខែចាស់។ជាមួយការកើនឡើងនេះ ក្រុមហ៊ុនអាកាសចរណ៍អន្តរជាតិមួយចំនួនក៏ត្រៀមបង្កើនជើងហោះហើរត្រង់ជាមួយកម្ពុជាផងដែរ។នេះបើយោងតាមមន្ត្រីអ្នកនាំពាក្យរដ្ឋលេខាធិការដ្ឋានអាកាសចរស៊ីវិល។
យោងតាមរបាយការណ៍ដដែល ក្នុងចំណោមជើងហោះហើរចំនួន ៤,៧១៤ជើង ក្នុងនោះជើងហោះហើរក្នុងស្រុកចំនួន ៤១៧ ជើង និង ជើងហោះហើរអន្ដរជាតិចំនួន ៤,២៩៧ ជើង។បើធៀបជាមួយខែ មិថុនា ជើងហោះហើយកើនឡើង ៧% អ្នកដំណើរកើនឡើង ១១% និង ការដឹកទំនិញកើនឡើង ៣%។
បើគ្មានអ្វីប្រែប្រួលនោះទេ មានក្រុមហ៊ុនអាកាសចរណ៍អន្តរជាតិមួយចំនួនកំពុងត្រៀមបង្កើនជើងហោះហើរត្រង់ជាមួយកម្ពុជា ក្នុងនោះមានជាអាទិ៍៖ ក្រុមហ៊ុនអាកាសចរណ៍ Vietnam Airline ត្រៀមបង្កើនជើងហោះហើរបន្ថែមទៀតពីហាណូយមកកាន់ទីក្រុងភ្នំពេញ។ក្រុមហ៊ុន Air Asia Thai ក៏ត្រៀមបង្កើនជើងហោះហើរពីភូកេតមកសៀមរាប ក្នុងមួយសប្ដាហ៍ចំនួន ៣ជើង ផងដែរ។
លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល រំពឹងទុកថា ចំនួនជើង ហោះ ហើរអាចនឹងបន្តកើនឡើងបន្ថែមទៀតនៅពេលខាងមុខ ជាពិសេសចាប់ពីខែតុលាចុងឆ្នាំ២០២៤នេះ។រំពឹងកើន ក្រោមហេតុផលថា ជារដូវកាល High Season ដែលជារដូវកាលភ្ញៀវទេសចរចេញដើរលេងកម្សាន្តក្រៅប្រទេស៕
