កោះកុង៖ រដ្ឋបាលជលផលស្មាច់មានជ័យ និងប្រជាសហគមន៍នេសាទពាមក្រសោប នៅថ្ងៃទី ២៦ ខែសីហាកន្លងទៅ បានជួយសង្គ្រោះសត្វផ្សោត ១ ក្បាល ជាប្រភេទ Risso’s Dolphin ក្រោយវាហែលទឹកទៅជាប់ឫសដើមកោងកាងរយៈពេលជិត២ម៉ោង ក្រោយផ្ទះប្រជាពលរដ្ឋ។
លោក ផៃ សាវិន នាយសង្កាត់រដ្ឋបាលជលផលស្មាច់មានជ័យ បានឱ្យដឹងថា សត្វផ្សោត ១ ក្បាល ជាប្រភេទ Risso’s Dolphin មានប្រវែង ២,៤០ ម៉ែត្រ ទម្ងន់ប្រមាណ ១២០ គីឡូក្រាម ត្រូវបានជួយសង្គ្រោះ ដោយជាប់នឹងឬសកោងកាង នៅខាងក្រោយផ្ទះប្រជាពលរដ្ឋ (ភូមិពាមក្រសោបចាស់) ហើយបាននាំយកទៅព្រលែងចំណុចខាងក្រៅ (ហៅឃ្លងយាយប៉ែន រ៉ន) ក្នុងឃុំពាមក្រសោប ស្រុកមណ្ឌលសីមា ខេត្តកោះកុង។
គួរបញ្ជាក់ថា មន្ត្រីសង្កាត់រដ្ឋបាលជលផលស្មាច់មានជ័យ ក៏បានផ្សព្វផ្សាយណែនាំដល់ប្រជាពលរដ្ឋ បន្តចូលរួមការពារអភិរក្សថែរក្សាប្រភេទសត្វកម្រ។ ករណីពលរដ្ឋនេសាទមកបរិភោគ ច្បាស់ជាមានទោសទណ្ឌមិនខាន៕
