ភ្នំពេញ៖ ក្នុងរយៈពេល៧ខែឆ្នាំ២០២៤នេះ(មករា-កក្កដា) ទំហំពាណិជ្ជកម្មកម្ពុជា-អន្តរជាតិ សម្រេចបានក្នុងទំហំ ៣១,៥៥១.៥១ លានដុល្លារ កើនឡើង ១៣.៩០ ភាគរយ បើធៀបរយៈពេលដូចគ្នាក្នុងឆ្នាំ២០២៣។ ក្នុងនោះកម្ពុជារកចំណូលបានចំនួន ១៤,៩៦៤.៤១ លានដុល្លារ ពីការនាំចេញទំនិញទៅកាន់ទីផ្សារនានានៅទូទាំងពិភពលោក កើនឡើង ១០.៦៤ ភាគរយ ហើយនាំចូលមកវិញក្នុងទំហំទឹកប្រាក់ ១៦,៥៨៧.១០ លានដុល្លារ កើនឡើង ១៧.០១ ភាគរយ។ នេះបើតាមរបាយការណ៍ដែលផ្តល់មកកាន់សារព័ត៌មានស៊ីស៊ីថាមស៍ ដោយលោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។
បើតាមរបាយការណ៍ មុខទំនិញសំខាន់ៗដែលកម្ពុជា បាននាំចេញច្រើនជាងគេ រួមមាន៖ សម្លៀកបំពាក់ និងគ្រឿងបន្ទាប់បន្សំ ដែលធ្វើឡើងពីក្រណាត់, ផ្លែឈើ និងគ្រាប់ផ្លែឈើ ដែលអាចបរិភោគបាន, ម៉ាស៊ីន និងឧបករណ៍អគ្គិសនី, ស្បែកជើង, កៅស៊ូ និង ផលិតផលធ្វើអំពីកៅស៊ូ រួមនឹងទំនិញសំខាន់ៗផ្សេងទៀត។
របាយការណ៍បញ្ជាក់ថា ក្នុងរយៈពេល៧ខែនេះ កម្ពុជាបាននាំចេញទំនិញទៅទីផ្សារអាសិបក្នុងទឹកប្រាក់ចំនួន ៥,១៩៩.៦៧ លានដុល្លារ, សហភាពអឺរ៉ុប ២,៤៣៣.៣១ លានដុល្លារ, ចក្រភពអង់គ្លេស ៥៣០.៩៦ លានដុល្លារ, សហរដ្ឋអាម៉េរិក ៥,៥១១.៦០ លានដុល្លារ, កាណាដា ៦០៥.១៦ លានដុល្លារ, អារ៉ាប់រួម ៣៩.៨៨ លានដុល្លារ, ឥណ្ឌា ១០៧.៦៩ លានដុល្លារ, និងប្រទេសផ្សេងៗទៀតចំនួន ៥៣៦.១៥ លានដុល្លារ៕
