ភ្នំពេញ៖ សមាគមសហគ្រិនសារព័ត៌មានសេដ្ឋកិច្ចកម្ពុជា (CEMEA) សហការជាមួយសមាគមសហព័ន្ធភ្នាក់ងារសេវាកម្មពន្ធដារកម្ពុជា (CTAFA) នៅថ្ងៃទី ១៥ សីហានេះ រៀបចំវគ្គបណ្ដុះបណ្តាលមួយស្តីពី ជំនាញសរសេរព័ត៌មានសេដ្ឋកិច្ច និង ចំណេះដឹងពាក់ព័ន្ធនឹងពន្ធដារ ដល់អ្នកសារព័ត៌មានប្រមាណ១៥០នាក់ មកពីបណ្ដាអង្គភាពសារព័ត៌មានានា។ វគ្គបណ្ដុះបណ្ដាលនេះ ក្រោមអធិបតីភាពលោក នេត្រ ភក្ត្រា រដ្ឋមន្រ្តីក្រសួងព័ត៌មាន។
វគ្គបណ្ដុះបណ្ដាលនេះ ដឹកនាំដោយលោក សុខ ចាន់ភក្តី រដ្ឋលេខាធិការក្រសួងព័ត៌មាន ទទួលបន្ទុកកិច្ចការងារសមាគមអ្នកសារព័ត៌មាននៅកម្ពុជា និង មានការអញ្ជេីញចូលរួមពីវាគ្មិនជាច្រេីនរូប ដែលសុទ្ធសឹងតែមានជំនាញក្នុងវិស័យហិរញ្ញវត្ថុ និង សេដ្ឋកិច្ចមកពីស្ថាប័នធំៗដូចជា៖ សមាគមធនាគារកម្ពុជា សមាគមមីក្រូហិរញ្ញវត្ថុកម្ពុជា សមាគមសហព័ន្ធភ្នាក់ងារសេវាកម្មពន្ធដារកម្ពុជា ព្រមទាំងស្ថាប័ន និងភាគីពាក់ព័ន្ធជាច្រេីន។
វគ្គបណ្ដុះបណ្ដាល ក្នុងបំណងជំរុញបេសកកម្មរួមបណ្តុះបណ្តាលជំនាញសរសេរ និងផ្សព្វផ្សាយព័ត៌មានសេដ្ឋកិច្ច នៅកម្ពុជាឱ្យបានទូលំទូលាយ និងប្រកបដោយវិជ្ជាជីវៈ។ តាមផែនការសកម្មភាពរបស់សមាគម CEMEA មានគម្រោងបណ្តុះបណ្តាល អ្នកសារព័ត៌សេដ្ឋកិច្ចចំនួន៣វគ្គ ចន្លោះ ពីខែ សីហា ដល់ខែ ធ្នូ ២០២៤ ហើយគ្រោងរៀបចំកម្មវិធីជជែកដេញដោល (Dialogue) ចំនួន១២ដងនៅក្នុងឆ្នាំ ២០២៥
គួរបញ្ជាក់ថា សមាគមសហគ្រិនសារព័ត៌មានសេដ្ឋកិច្ចកម្ពុជា (CEMEA) បានទទួលស្គាល់ពីក្រសួងមហាផ្ទៃ ត្រូវបានបង្កើតឡើងក្នុងគោលបំណងជំរុញការផ្សព្វផ្សាយព័ត៌មានសេដ្ឋកិច្ច អចលនវត្ថុ ហិរញ្ញវត្ថុ ទេសចរណ៍ជាដើម ឱ្យទូលំទូលាយទៅកាន់សាធារណៈជនជាតិ និងអន្តរជាតិ៕
