![](https://cdn.cc-times.com/kh.cc-times.com/media/50961/large/452105206_884958350332432_4250589837135575808_n.jpg?1721635342)
បាត់ដំបង៖ អាជ្ញាធរមីន បានឲ្យដឹងនៅថ្ងៃទី២១ ខែកក្កដា ឆ្នាំ២០២៤ ប្រទះឃើញមីនចំនួន ៧១គ្រាប់ និងមានគីបមួយចំនួនទៀត ត្រូវបានប្រជាពលរដ្ឋប្រទះឃើញនៅមាត់អូរ ភូមិអូរគគី ឃុំអូរដា ស្រុកកំរៀង ខេត្តបាត់ដំបង។
![](https://cdn.cc-times.com/kh.cc-times.com/media/50962/large/452370436_884958390332428_1060828790289614155_n.jpg?1721635352)
យោងតាមសមត្ថកិច្ចអាជ្ញាធរមីន បានឲ្យដឹងថា ក្រោយប្រជាពលរដ្ឋឃើញគ្រាប់មីនជាច្រើននៅរាយប៉ាយតាមមាត់អូរព្រំដែន ក្នុងភូមិសាស្ត្រខាងលើ បានមករាយការណ៍ប្រាប់សមត្ថកិច្ចឱ្យចុះទៅពិនិត្យមើល នឹងបានរកឃើញថា គ្រាប់មីនប្រឆាំងមនុស្សទាំងនោះអាចសល់មកពីសម័យសង្គ្រាមមានចំនួន ៧១គ្រាប់ ជាប្រភេទមីនខ្យល់ (PMN2) និងផ្សេងៗឬៀត ដែលអាចបង្កឱ្យមនុស្សគ្រោះថ្នាក់ដាច់ដៃជើង ឬបាត់បង់ជីវិតបាន ប្រសិនបើទៅចាប់កាន់ ឬប៉ះពាល់វា។
![](https://cdn.cc-times.com/kh.cc-times.com/media/50963/large/452105600_884958420332425_3120539283949841851_n.jpg?1721635361)
គួរបញ្ជាក់ថា បច្ចុប្បន្នគ្រាប់ទាំងនេះ ត្រូវបានប្រគល់ជូនមជ្ឈមណ្ឌលសកម្មភាពកំចាត់មីនកម្ពុជា(CMAC) ដើម្បីប្រមូលទុកកំទេចចោល។ អាជ្ញាធរមីន ក៏អំពាវនាវដល់ប្រជាពលរដ្ឋទាំងអស់នៅពេលឃើញមីន និងគ្រាប់មិនទាន់ផ្ទុះ កុំប៉ះពាល់ កែច្នៃ គប់ ដុំ ឫចល័តទៅទីណាមួយ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល៕