![](https://cdn.cc-times.com/kh.cc-times.com/media/50876/large/photo_2024-07-19_13-58-17.jpg?1721375628)
សៀមរាប៖ មន្ត្រីជំនាញអាជ្ញាធរជាតិអប្សរា បានបើកយុទ្ធនាការចែកកូនឈើជូនពលរដ្ឋរស់នៅក្រុងរុនតាឯក តេជោសែន ចំនួន ៥,០០០ដើម ដោយមិនគិតថ្លៃ ដើម្បីបង្កើនគម្របបៃតង ការផ្តល់ជាម្លប់ និងការពារការប្រែប្រួលអាកាសធាតុជាដើម។ នៅក្នុងយុទ្ធនាការនោះ មានកូនឈើចំនួយ ១០ប្រភេទ រួមមាន៖ ឈើបេង ក្រញូង ផ្ចឹក សុក្រម ដើមឈើមានផ្កាលម្អ និងដើមឈើអាចអាស្រ័យផល។
![](https://cdn.cc-times.com/kh.cc-times.com/media/50877/large/photo_2024-07-19_13-58-49.jpg?1721375649)
លោក ស៊ុន កែវពិសី អនុប្រធានប្រចាំការ នៃអង្គភាពគ្រប់គ្រងភូមិធម្មជាតិរុនតាឯក មានប្រសាសន៍ថា ក្រុមការងារអាជ្ញាធរជាតិអប្សរា បានបើកយុទ្ធនាការចែកជូនកូនឈើ ដោយមិនគិតថ្លៃ ដល់បងប្អូនប្រជាពលរដ្ឋរស់ នៅក្នុងក្រុងរុនតាឯក តេជោសែន ខណៈជំហានដំបូងកូនឈើដែលបានត្រៀមសម្រាប់ចែកជូននេះ មានចំនួនប្រមាណ៥,០០០ដើម ដែលយុទ្ធនាការ និងចាប់ផ្តើមពីដើមរដូវវស្សា រហូតដល់ចុងបញ្ចប់នៃរដូវវស្សា ក្នុងឆ្នាំ២០២៤។
![](https://cdn.cc-times.com/kh.cc-times.com/media/50878/large/photo_2024-07-19_13-58-49_(2).jpg?1721375688)
អ្នកស្រី លាន សុភ័ក្រ ប្រជាពលរដ្ឋរស់នៅភូមិតានី ក្រុងរុនតាឯក តេជោសែន មកទទួលកូនឈើយកទៅដាំដុះនៅគេហដ្ឋានរបស់ខ្លួន បានបង្ហាញអារម្មណ៍សប្បាយរីករាយ នៅពេលអាជ្ញាធរជាតិអប្សរា ចែកជូនកូនឈើចម្រុះ ដល់ពលរដ្ឋអាចយកទៅដាំដុះនៅក្បែៗផ្ទះ ដើម្បីផ្តល់ជាម្លប់ បង្កើនសោភ័ណ្ឌភាពបៃតង និងអាចពឹងអាស្រ័យផល បាននៅពេលដើមឈើទាំងនោះធំលូតលាស់ក្នុងពេល ២ឬ៣ឆ្នាំខាងមុខ។
![](https://cdn.cc-times.com/kh.cc-times.com/media/50880/large/photo_2024-07-19_13-58-11.jpg?1721375718)
ចំណែកអ្នកស្រី សាំង សារឿន ពលរដ្ឋរស់នៅក្នុងក្រុងរុនតាឯក តេជោសែន មានប្រសាសន៍ថា ការផ្តល់ជូនកូនឈើរបស់អាជ្ញាធរជាតិអប្សរានាពេលនេះ គឺស្របនឹងការចង់បានរបស់ពលរដ្ឋក្នុងសហគមន៍ ព្រោះថាពលរដ្ឋខ្លះទើបតែចូលមករស់នៅថ្មីៗ ត្រូវការដើមឈើ យកទៅដាំដើម្បីផ្តល់ជាប្រយោជន៍ក្នុងពេលខាងមុខ៕