ក្រុមតន្រ្តីកូរ៉េខាងត្បូង១ក្រុមប្រើ«ភាសាខ្មែរ»បង្កើតជាពាក្យ«GLUE»សម្រាប់បទថ្មីរបស់ពួកគេ

កូរ៉េ៖ ក្រុមតន្រ្តីរបស់កូរ៉េខាងត្បូង HYUKOH បានសហការជាមួយក្រុមតន្ដ្រីតៃវ៉ាន់ Sunset RollerCoaster បង្កើតបទចម្រៀងមួយបទដែលមានចំណងជើងថា «GLUE» ដោយប្រើប្រាស់ភាសាខ្មែរបង្កើតជាអក្សរឡូហ្គោ «GLUE» សម្រាប់បទចម្រៀងថ្មីរបស់ពួកគេ។ បទចម្រៀងនេះ នឹងចេញនៅថ្ងៃទី១០ កក្កដា វេលាម៉ោង ៤រសៀល ម៉ោងនៅប្រទេសកម្ពុជា។

ក្រុម HYUKOH និងក្រុម Sunset RollerCoaster នឹងចេញបទចម្រៀងថ្មីរបស់ពួកគេ នារសៀលម៉ោង៤ថ្ងៃនេះ។ បទចម្រៀងថ្មីរបស់ពួកគេ បានប្រើប្រាស់ភាសាខ្មែរ បង្កើតជាអក្សរឡូហ្គោ «GLUE»។ មិនតែប៉ុណ្ណោះ បទចម្រៀងនេះ ក៏នឹងបង្ហាញពីទិដ្ឋភាពខ្លះៗពីប្រាសាទមួយចំនួនរបស់ខ្មែរ ដូចជា ប្រសាទអង្គរវត្ត ប្រាសាទតាព្រហ្ម និងប្រាសាទបាយ័នជាដើម។

សូមជម្រាបថា HYUKOH គឺជាក្រុមតន្ត្រី indie របស់កូរ៉េខាងត្បូង ដែលស្ថិតនៅក្រោមក្រុមហ៊ុន DooRooDooRoo Artist ។ ក្រុមនេះត្រូវបានបង្កើតឡើងឆ្នាំ២០១៤ ដែលមានអ្នកដឹកនាំ តារាចម្រៀង និងអ្នកលេងហ្គីតា Oh Hyuk, អ្នកលេងហ្គីតាបាស Im Dong-geon, អ្នកលេងហ្គីតា Lim Hyun-jae និង អ្នកវាយស្គរ Lee In-woo ។

Sunset RollerCoaster គឺជាក្រុមតន្រ្តីរ៉ុកបែប indie ដែលបានបង្កើតក្រុមនៅទីក្រុងតៃប៉ិ កោះតៃវ៉ាន់ ឆ្នាំ២០១០។ ក្រុមតន្រ្តីនេះមានអ្នកច្រៀង និងអ្នកលេងហ្គីតា 國國 (Kuo-kuo), អ្នកលេងហ្គីតាបាស Kevin និងអ្នកវាយស្គរ 尊龍 (Tzun-Long) ៕