ព្រះសីហនុ៖ គណៈកម្មាធិការសម្របសម្រួលអន្តរក្រសួងរៀបចំផែនការមេ ដើម្បីអភិវឌ្ឍន៍ខេត្តព្រះសីហនុ នៅថ្ងៃទី ៩ កក្កដានេះ បានរៀបចំកិច្ចប្រជុំលើកទី៣ ដើម្បីពិនិត្យ និង ផ្តល់យោបល់លើសេចក្តីព្រាង ផែនការមេដើម្បីអភិវឌ្ឍ ខេត្តព្រះសីហនុទៅជា«តំបន់សេដ្ឋកិច្ចពិសេសគំរូពហុបំណង» និង «ផែនការសកម្មភាព» មុននឹងដាក់ជូនរាជរដ្ឋាភិបាលអនុម័ត។ជាផែនការ ដើម្បីរៀបចំអភិវឌ្ឍន៍ ខេត្តព្រះសីហនុឱ្យទៅជា «ច្រកទ្វាអន្តរជាតិ,ប៉ូលអភិវឌ្ឍន៍,ទីក្រុងធំក្នុងអាស៊ាន»។
យោងតាមសេចក្តីប្រកាសព័ត៌មាន «ផែនការមេ»នេះ មានចក្ខុវិស័យវែងឆ្ងាយដើម្បីរៀបចំអភិវឌ្ឍន៍ ខេត្តព្រះសីហនុ ទៅជា ច្រកទ្វាអន្តរជាតិរបស់កម្ពុជា ដែលជាមជ្ឈមណ្ឌលដឹកជញ្ជូនពហុមធ្យោបាយ និង ឡូជីស្ទិក ពាណិជ្ជកម្ម និង ហិរញ្ញវត្ថុអន្តរជាតិ។ទី២ ជាប៉ូលអភិវឌ្ឍន៍ជាតិ តាមរយៈប្រែក្លាយជាគោលដៅទេសចរណ៍ឆ្នេរសមុទ្រ និង ប្រជុំកោះលំដាប់សកលលោក មានមជ្ឈមណ្ឌលជាតិនៃការអភិវឌ្ឍឧស្សាហកម្ម នវានុវត្តន៍បច្ចេកវិទ្យា និង ទី៣ ជាទីក្រុងធំមួយនៅក្នុងតំបន់អាស៊ាន ជាមួយនឹងកិត្តិនាមទីក្រុងគំរូបៃតងប្រកបដោយចីរភាព និង ចម្រុះវប្បធម៌ និង ឆ្លាតវៃ។
.jpg?1720532665)
