អាកាសយានដ្ឋានអន្ដរជាតិ«តារាសាគរ»អាចនឹងបើកដំណើរការនៅខែសីហានេះកម្រិត2Bសិន

កោះកុង៖ អាកាសយានដ្ឋានអន្ដរជាតិ«តារាសាគរ» ស្ថិតក្នុងស្រុកបុទមសាគរ ខេត្តកោះកុង ជាការវិនិយោគដោយក្រុមហ៊ុនចិន Union Development Group (UDG) ក្នុងទំហំទឹកប្រាក់ប្រមាណជិត៣០០លានដុល្លារអាម៉េរិក លើផ្ទៃដីប្រមាណជិត៦០០ហិចតា អាចនឹងដាក់ឲ្យដំណើរការហោះហើរ នៅក្នុងបំណាច់ខែសីហា ឆ្នាំ២០២៤ខាងមុននេះ។នេះបើយោងតាមលោក ស៉ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល ប្រាប់សារព័ត៌មាន ស៊ីស៊ីថាមស៍។

លោក ស៉ីន ចាន់សិរីវុត្ថា បានថ្លែងថា កាលពីថ្ងៃទី៣០ ខែមិថុនា កិច្ចប្រជុំកម្រិតបច្ចេកទេសដើម្បីពិនិត្យវាយតម្លៃវឌ្ឍនភាពអាកាសយានដ្ឋានអន្តរជាតិតារាសាគរ ដើម្បីស្នើសុំអោយដាក់ដំណើរការ ការហោះហើរជាលក្ខណៈក្នុងស្រុកកម្រឹតបឋមជំហានដំបូង រួមជាមួយការបន្តធ្វើនូវនីតិវិធីបន្តបន្ទាប់ ដើម្បីឈានជបណ្តើរៗ ទៅរកការបើកការហោះហើរកម្រឹតមធ្យម កម្រឹតធំ នឹងជាលក្ខណះអន្តរជាតិនាពេលខាងមុខ បន្តទៀត។

បើតាមលោក ស៉ីន ចាន់សិរីវុត្ថា បើគ្មានអ្វីប្រែប្រួលទេការបើកដំណើរការអាកាសយានដ្ឋានអន្តរជាតិតារាសាគរ អាចនឹងធ្វើឡើង នៅក្នុងបំណាច់ខែ សីហា ឆ្នាំ ២០២៤ខាងមុខ ក្នុងកម្រឹតបឋមដំណាក់កាលទី១ សម្រាប់តែអាកាសយានខ្នាតតូចកម្រិត2B ហើយក្នុងករណីក្រុមហ៊ុនមានគោលបំណងចង់ប្រតិបត្តិការហោះហើរលក្ខណៈអន្តរជាតិ ត្រូវស្នើសុំវិញ្ញាបនបត្រពីអាកាសចរណ៍ស៊ីវិលជាចាំបាច់។

សម្រាប់លោក ស៉ីន ចាន់សិរីវុត្ថា បច្ចុប្បន្ននេះ អាកាសយានដ្ឋានតារាសាគរ សាងសង់បានប្រមាណជិត ១០០% ហើយ មានលក្ខណៈបច្ចេកទេសគ្រប់គ្រាន់ក្នុងការធ្វើការប្រតិបត្តិការហោះហើរ ក្នុងស្រុក ដំណាក់កាលដំបូង សម្រាប់តែអាកាសយានប្រភេទ 2B។

គួរបញ្ជាក់ថា គម្រោងសាងសង់«អាកាសយានដ្ឋានតារាសាគរ»ស្ថិតក្នុងស្រុកបុទមសាគរ ខេត្តកោះកុង ជាការវិនិយោគដោយក្រុមហ៊ុនចិន Union Development Group ក្នុងទំហំទឹកប្រាក់ប្រមាណជិត៣០០លានដុល្លារអាម៉េរិក សម្រាប់ការសាងសង់២ដំណាក់កាល ក្នុងដំណាក់កាលទី១ ចាយលុយអស់ជាង ២០០លានដុល្លារ លើផ្ទៃដី២១៨ ហិចតា និងមានដីបំរុងទុកជិត១០០០ហិចតា។ គម្រោងសាងសង់នេះ បានចាប់ដំណើរការកាលពីថ្ងៃទី ២៦ វិច្ឆិកា ឆ្នាំ២០១៦ ហើយ ត្រូវបានពន្យាពេលរហូតមកដល់បច្ចុប្បន្ន៕