ភ្នំពេញ៖ ក្នុងយុទ្ធនាការដាំដើមឈើ ដើម្បីអភិរក្សរមណីយដ្ឋានអង្គរ បេតិកភណ្ឌពិភពលោក អាជ្ញាធរជាតិអប្សរា សហការជាមួយអង្គការ IDE និងអង្គការ FAO ដាំកូនឈើចម្រុះចំនួន ៧០០ដើម ក្នុងបរិវេណរមណីយដ្ឋានអង្គរ កាលពីថ្ងៃទី២៨ ខែមិថុនា ឆ្នាំ២០២៤។
បុគ្គលិកអង្គការ IDE ប្រចាំខេត្តសៀមរាប ចំនួន២០នាក់ កាលពីថ្ងៃទី២៨ មិថុនា បានសហការជាមួយអាជ្ញាធរជាតិអប្សរា ចូលរួមដាំកូនឈើចម្រុះចំនួន ១០០ដើម នៅខាងកើតដងស្ទឹងសៀមរាប ស្ថិតនៅខាងជើងស្ពានបច្ចេកទេស(ស្ពានរ៉ោករ៉ាក)នៃឧទ្យានអង្គរ។
នៅថ្ងៃដដែលនោះ បុគ្គលិកអង្គការ FAO រួមជាមួយសិក្ខាកាមចំនួន១២០នាក់ ក៏បានចូលរួមដាំកូនឈើចម្រុះចំនួន ៦០០ដើម នៅខាងលិចដងស្ទឹងសៀមរាបនៃឧទ្យានអង្គរ ដើម្បីបន្សល់ទុកជាស្នាដៃសម្រាប់ការងារសង្គម និងទុកជាអនុស្សាវរីយ៍នៃការចងចាំក្នុងរមណីយដ្ឋានអង្គរផង។
សូមជម្រាបថា ក្រៅពីការសហការជាមួយអង្គការនានា ដើម្បីដាំកូនឈើចម្រុះ នៅតំបន់អង្គរ អាជ្ញាធរជាតិអប្សរា ក៏បាននឹងកំពុងបណ្ដុះប្រភេទ រុក្ខជាតិត្នោត ដើមរាំង ដើមស្ដៅ និងដើមអំពិល ដើម្បីដាំនៅជើងទំនប់ទឹក ដ្បិតរុក្ខជាតិទាំងនេះមានភាពធន់នឹងទឹក និងអាកាសធាតុ ដែលអាចឱ្យគេយកទៅដាំដុះនៅជើងទំនប់ និងទីទំនាបលិចទឹកបាន៕
