ភ្នំពេញ៖ ក្នុងរយៈពេល៤ខែឆ្នាំ២០២៤ (ចាប់ពីខែមករា-មេសា) កម្ពុជាទទួលបានភ្ញៀវអន្តរជាតិសរុបចំនួន ២,១១៦,៦០៩ នាក់ កើនឡើង ២២.៩ ភាគរយ បើធៀបរយៈពេលដូចគ្នាក្នុងឆ្នាំ២០២៣។ ក្នុងចំណោមទេសចរជាង២,១លាននាក់នោះ កម្ពុជាទទួលបានភ្ញៀវទេសចរថៃច្រើនជាងគេ។ នេះបើតាមរបាយការណ៍របស់ក្រសួងទេសចរណ៍។
យោងតាមរបាយការណ៍ ក្នុងចំណោមភ្ញៀវទេសចរអន្តរជាតិជាង ២,១លាននាក់នេះ ភ្ញៀវទេសចរដែលបានមកដល់កម្ពុជាតាមរយៈការហោះហើរមានចំនួន ៨២៤,៩៥៧ នាក់; ផ្លូវគោក ១,២៥២,៥៥៦ នាក់ និងផ្លូវទឹកមានចំនួន ៣៩,០៩៦ នាក់។
របាយការណ៍បញ្ជាក់ថា ទីផ្សារទាំង១០ដែលមានភ្ញៀវទេសចរមកកម្សាន្តនៅកម្ពុជាច្រើនជាងគេរួមមាន៖ ថៃ ៥៨៨,៣១២ នាក់ វៀតណាម ៤១៤,៣៦៦ នាក់ ចិន ២៦០,៤៥៥ នាក់ ឡាវ ១១៧,៧២៥ នាក់ អាម៉េរិក ៨២,៨៦២ នាក់ កូរ៉េ ៧៨,៤៦១នាក់ បារាំង ៥៤,០០៣ នាក់ ឥណ្ឌូនេស៊ី ៥២,៦៣៩ នាក់ អង់គ្លេស ៤៩,០០០នាក់ និង ជប៉ុន ៣៩,៣៦៧ នាក់៕
