![](https://cdn.cc-times.com/kh.cc-times.com/media/49373/large/photo_2024-06-07_16-02-15.jpg?1718082233)
សៀមរាប៖ ក្រុមការងារបច្ចេកទេសនាយកដ្ឋានអភិរក្សប្រាសាទនិងបុរាណវិទ្យា នៃអាជ្ញាធរជាតិអប្សរា កំពុងធ្វើកំណាយស្រាវជ្រាវទិន្នន័យបុរាណវិទ្យាទៅលើរចនាសម្ពន្ធរបស់ស្ពានហាលផ្នែកខាងកើតនៃប្រាសាទបេងមាលា ដើម្បីឈានទៅដល់គម្រោងជួសជុលនៅពេលខាងមុខ។ គម្រោងជួសជុលស្ពានហាលខាងកើតប្រាសាទបេងមាលា ស្ថិតក្រោមមូលនិធិនៃកិច្ចសហប្រតិបត្តិការមេគង្គ-ឡានឆាង។
លោក ពុទ្ធ សុទ្ធ មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា ដែលបានដឹកនាំធ្វើកំណាយ បានឱ្យដឹងថា ក្រុមការងារបានចាប់ផ្ដើមធ្វើកំណាយស្រាវជ្រាវនៅលើស្ពានហាលនេះ គឺដើម្បីពិនិត្យលទ្ធភាពក្នុងការជួសជុលរចនាសម្ពន្ធស្ពានហាលខាងកើតប្រាសាទបេងមាលាឡើងវិញ។
![](https://cdn.cc-times.com/kh.cc-times.com/media/49374/large/photo_2024-06-07_15-58-15.jpg?1718082252)
លោក ពុទ្ធសុទ្ធ បានបន្ដថា ពេលកំណាយបកស្រទាប់ដីខាងលើឃើញថា កម្រាលស្ពានហាលផ្នែកខាងកើតនៃប្រាសាទបេងមាលាមានការស្រុតខ្លាំងដោយកន្លែង គ្រឹះក៏ចុះខ្សោយ និងហែកចេញពីគ្នា ធ្វើឱ្យគ្រឿងបង្គុំរបស់រចនាសម្ពន្ធស្ពានហាលមួយចំនួនមានដូចជា សសរ បង្កាន់ដៃនាគ ខ្លួននាគ ក្បាលនាគ បាក់ជាច្រើនបំណែកធ្លាក់ចូលក្នុងកសិន្ធុ និងខ្លះទៀតកប់ក្នុងដី ដែលបណ្តាលមកពីកត្តាអាយុកាល និងធម្មជាតិ។
សូមជម្រាបថា ប្រាសាទបេងមាលាមានទីតាំងស្ថិតនៅភូមិបេងមាលា ស្រុកស្វាយលើ ខាងកើតជើងភ្នំគូលេន និងមានចម្ងាយប្រហែល ៧៧គីឡូម៉ែត្រពីក្រុងសៀមរាប។ ប្រាសាទបេងមាលា ត្រូវបានសាងសង់ឡើងដោយព្រះបាទសូរ្យវរ្ម័នទី២ នៅចុងសតវត្សរ៍ទី ១១ និងដើមសតវត្សរ៍ទី១២ លើផៃ្ទដីទំហំ ១៤ហិកតា ដើម្បីឧទ្ទិសថ្វាយដល់ព្រះអាទិទេពក្នុងព្រហ្មញ្ញសាសនា និកាយវិស្ណុនិយម៕
![](https://cdn.cc-times.com/kh.cc-times.com/media/49376/large/photo_2024-06-07_15-56-23.jpg?1718082269)
![](https://cdn.cc-times.com/kh.cc-times.com/media/49375/large/photo_2024-06-07_15-58-26.jpg?1718082269)
![](https://cdn.cc-times.com/kh.cc-times.com/media/49377/large/photo_2024-06-07_15-57-35.jpg?1718082288)
![](https://cdn.cc-times.com/kh.cc-times.com/media/49378/large/photo_2024-06-07_15-58-21.jpg?1718082288)
![](https://cdn.cc-times.com/kh.cc-times.com/media/49380/large/photo_2024-06-07_16-00-25.jpg?1718082300)
![](https://cdn.cc-times.com/kh.cc-times.com/media/49379/large/photo_2024-06-07_15-57-06.jpg?1718082300)
![](https://cdn.cc-times.com/kh.cc-times.com/media/49381/large/photo_2024-06-07_15-58-09.jpg?1718082322)
![](https://cdn.cc-times.com/kh.cc-times.com/media/49382/large/photo_2024-05-31_15-27-19.jpg?1718082332)