ព្រះសីហនុ៖ ប្រទះឃើញគ្រាប់បែកចំនួន២គ្រាប់ នៅខាងមុខផ្សារទំនើបព្រីន៍ម៉ល សង្កាត់៣ ក្រុងព្រះសីហនុ ខេត្តព្រះសីហនុ កាលពីថ្ងៃទី៣០ ឧសភា ម្សិលមិញនេះ។ គ្រាប់បែកនោះ មានមួយគ្រាប់មិនទាន់ផ្ទុះ និងមួយគ្រាប់ទៀត បានផ្ទុះរួចហើយ ជាគ្រាប់បែកផ្សែង និងមិនបណ្តាលឲ្យមានមនុស្សរងគ្រោះថ្នាក់នោះទេ។ បច្ចុប្បន្នសមត្ថកិច្ច កំពុងធ្វើការស្រាវជ្រាវគ្រាប់បែកមិនទាន់ផ្ទុះ និងពុំទាន់អាចបញ្ជាក់ព័ត៌មានឲ្យបាននៅឡើយថាជាគ្រាប់បែកពិតឬក្លែងក្លាយ។
សេចក្តីរាយការបឋម មានពលរដ្ឋប្រទះឃើញគ្រាប់បែកចំនួន២គ្រាប់ នៅក្នុងធុងសំរាម។ ហេតុការណ៍នេះ បានកើតឡើងនៅវេលាម៉ោងជិត៣រសៀល នៅថ្ងៃទី៣០ ខែឧសភា ឆ្នាំ២០២៤នេះ នៅក្នុងធុងសំរាម ខាងមុខផ្សារទំនើបព្រីន៍ម៉ល ស្ថិតនៅក្នុងសង្កាត់៣ ក្រុងព្រះសីហនុ ខេត្តព្រះសីហនុ ។
ប្រភពដដែលបន្តថា ខណៈពេលពួកគេ កំពុងលើកសំរាមដាក់ក្នុងរថយន្តដឹកសំរាម និង កាយញ៉ែករកសំបកកំប៉ុងអេតចាយ ស្រាប់តែ ប៉ះគ្រាប់បែកមួយគ្រាប់ ផ្ទុះហុយផ្សែងពាល់ពេកមេឃ និង មួយគ្រាប់ទៀត ពុំទាន់ផ្ទុះនៅឡើយទេ។ ភ្លាមៗនោះ ពួកគេក៏បានរាយការណ៍ទៅអាជ្ញាធរមូលដ្ឋានចុះអន្តរាគមន៍ស្រាវជ្រាវភ្លាមៗ ហើយករណីនេះមិនបណ្តាលឲ្យមានមនុស្សរងគ្រោះថ្នាក់នោះទេ។
បើតាមសមត្ថកិច្ចឲ្យដឹងជាបឋមថា គ្រាប់បែកដែលបានផ្ទុះមួយគ្រាប់នោះជាគ្រាប់បែកផ្សែង និង មួយគ្រាប់ទៀតដែល ពុំទាន់ផ្ទុះនោះ អាជ្ញាធរមានសមត្ថកិច្ច ពុំទាន់អាចបញ្ជាក់ព័ត៌មានឲ្យបាននៅឡើយថាជាគ្រាប់បែកពិតឬក្លែងក្លាយ ដោយគ្រាន់តែប្រាប់ខ្លីៗថា កំពុងស្រាវជ្រាវ ៕
