ភ្នំពេញ៖ រដ្ឋមន្ត្រីក្រសួងសាធារណការ និង ដឹកជញ្ជូន នៅថ្ងៃទី ៣០ ឧសភានេះ បានកោះហៅអ្នកជំនាញធ្វើបទបង្ហាញអំពីលទ្ធផលនៃការសិក្សាសមិទ្ធិលទ្ធភាពបឋម គម្រោងសាងសង់ផ្លូវជាតិលេខ ៥០C និង ស្ពានឆ្លងកាត់ទន្លេសាប តភ្ជាប់ខេត្តកំពង់ធំ ទៅកាន់ខេត្តកំពង់ឆ្នាំង។សម្រាប់គម្រោងទាំងនេះ គឺកំពុងរង់ចាំតែការពិនិត្យសម្រេចអំពីឥណទានសម្បទានចិនប៉ុណ្ណោះ។
ម្រោងសាងសង់ ផ្លូវជាតិលេខ ៥០C និង ស្ពានឆ្លងកាត់ទន្លេសាប តភ្ជាប់ខេត្តកំពង់ធំ ទៅកាន់ខេត្តកំពង់ឆ្នាំង គឺជាសមិទ្ធិផលថ្មីដែលប្រជាពលរដ្ឋទន្ទឹមរង់ចាំ។នៅថ្ងៃនេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានជួបជាមួយក្រុមអ្នកបច្ចេកទេស ធ្វើបទបង្ហាញអំពីលទ្ធផលនៃការសិក្សាសមិទ្ធិលទ្ធភាពបឋមគម្រោងទាំងនេះ។
បន្ទាប់ពីបានស្តាប់ការធ្វើបទបង្ហាញរួច លោក បានផ្តល់អនុសាសន៍ឱ្យ ថ្នាក់ដឹកនាំទទួលបន្ទុកគម្រោងខាងលើ ដឹកនាំសម្របសម្រួលរៀបចំកិច្ចប្រជុំកម្រិតបច្ចេកទេស ដោយមានការចូលរួមពី អគ្គនាយកដ្ឋានជំនាញ និងភាគីពាក់ព័ន្ធ ដើម្បីជជែកពិភាក្សា និង ពិនិត្យវាយតម្លៃឱ្យបានគ្រប់ជ្រុងជ្រោយ ទៅលើលទ្ធផលនៃការសិក្សាសមិទ្ធិលទ្ធភាពបឋម។
អ្នកនាំពាក្យក្រសួងសាធារណការ និងដឹកជញ្ជូន លោក ផន រឹម បានថ្លែងប្រាប់ ស៊ីស៊ីថាមស៍ ថា ក្រុមហ៊ុនសាជីវកម្មស្ពាន-ថ្នល់ចិន (CRBC) បានចេញរបាយការណ៍សិក្សាសមិទ្ធិលទ្ធភាព (Feasibility Study) គម្រោងស្ថាបនាផ្លូវជាតិលេខ៥០C រួចហើយ យើងរង់ចាំតែការពិនិត្យសម្រេចអំពីឥណទានសម្បទានចិនប៉ុណ្ណោះ។
គួរបញ្ជាក់ថា ផ្លូវជាតិលេខ៥០សេ ពីឃុំច្រណូក ស្រុកកំពង់លែង ទៅកាន់ក្រុងស្ទឹងសែន ខេត្ត កំពង់ធំដែលមានប្រវែង ១៧ គីឡូម៉ែត្រក្នុងពេលនេះ អាចធ្វើចរាចរណ៍បានទាំងខែវស្សា និង ខែប្រាំង ហើយគម្រោងធំមួយទៀតនោះ គឺការកសាងស្ពានថ្មមានប្រវែងជាង៣០០០ ម៉ែត្រ ដែលជាស្ពា នវែងជាងគេនៅក្នុងប្រទេសកម្ពុជាកសាងឆ្លងកាត់ទន្លេ៣ ក្នុងក្រុងកំពង់ឆ្នាំង និងស្រុកកំពង់លែង នៃខេត្តកំពង់ឆ្នាំងតភ្ជាប់ជាមួយផ្លូវលេខ៥០សេ នេះទៅកាន់ខេត្ត កំពង់ធំ៕
