ភ្នំពេញ៖ នាយកដ្ឋានរៀបចំ និងគ្រប់គ្រងព្រឹត្តិការណ៍កីឡា កាលពីថ្ងៃទី២៦ ខែឧសភា ឆ្នាំ២០២៤ បានប្រារព្វពិធីបិទបញ្ចប់ការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ នៅក្នុងពហុកីឡដ្ឋានជាតិ រាជធានីភ្នំពេញ ដំណើរការប្រកួតមានរយៈពេល ១០ថ្ងៃ គឺចាប់ពីថ្ងៃទី១៨ ខែឧសភា ឆ្នាំ២០២៤ រហូតដល់ពេលនេះ ទទួលបានជោគជ័យយ៉ាងត្រចះត្រចង់។
លោក ហួត សេងទ្រី ប្រធាននាយកដ្ឋានរៀបចំ និងគ្រប់គ្រងព្រឹត្តិការណ៍កីឡា មានប្រសាសន៍ថា ការប្រកួតកីឡាឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ឆ្នាំ២០២៤ នៅក្នុងឆ្នាំនេះមាន ១៣ប្រភេទកីឡាគឺ បាល់ទាត់ បាល់ទះ បាល់បោះ អត្តពលកម្ម ប៉េតង់ ហែលទឹក វាយកូនឃ្លីលើតុ វាយសី តេក្វាន់ដូ WT តេក្វាន់ដូ ITF ការ៉ាតេ សីដក់ និងគុនដាវ ដែលមានគ្រឹះស្ថានឧត្តមសិក្សា និងមធ្យមសិក្សាបច្ចេកទេសចូលរួមសរុបចំនួន៤៧ និង កីឡាករ កីឡាការិនីសរុបចំនួន ១,៧៦៤នាក់ ស្រី៣៩១នាក់ លើ១០៣វិញ្ញាសា នៅលើទីលានចំនួន ១០ទីតាំង។
សូមជម្រាបថា នៅក្នុង ១៣ប្រភេទកីឡា មានកីឡាករ កីឡាការិនី ឈ្នះមេដាយមាសចំនួន ១០១គ្រឿង មេដាយប្រាក់ ១០១គ្រឿង និងមេដាយសំរឹទ្ធចំនួន ១២៩គ្រឿង។ នៅក្នុងនោះសាកលវិទ្យាលល័យអាស៊ីអ៊ឺរ៉ុប ឈ្នះមេដាយមាសច្រើនជាងគេ រហូតដល់ ២៨គ្រឿង តាមពីក្រោយដោយវិទ្យាស្ថានខេមអេដ ឈ្នះមេដាយមាសចំនួន ១៩គ្រឿង និងសាកលវិទ្យាល័យវេស្ទើន ឈ្នះមេដាយមាស ១៦គ្រឿង៕
