ភ្នំពេញ៖ ក្រុមហ៊ុនអាកាសចរណ៍ក្នុងស្រុករបស់កម្ពុជា គឺ Cambodia Angkor Air បានត្រៀមខ្លួនរួចស្រេចក្នុងការបើកជើងហោះហើររបស់ខ្លួនទៅកាន់ប្រទេសឥណ្ឌា ចាប់ពីថ្ងៃទី១៦ ខែមិថុនា ឆ្នាំ២០២៤ ខណៈក្រុមហ៊ុនអាកាសចរណ៍ឥណ្ឌា IndiGo ត្រូវបានរដ្ឋាភិបាលនៃប្រទេសទាំងពីរអនុញ្ញាតឱ្យបើកជើងត្រង់ហើរត្រង់មកកម្ពុជា ចាប់ពីខែតុលា ឆ្នាំ២០២៤។នេះបើយោងតាមលោក ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល។
លោក ស៊ិន ចាន់សិរីវុត្ថា បានប្រាប់ ស៊ីស៊ីថាមស៍ថា ថ្ងៃនៅទី១៦ ខែមិថុនា ខាងមុខនេះ ក្រុមហ៊ុនអាកាសចរណ៍ Cambodia Angkor Air នឹងចាប់ផ្តើមបើកការហោះហើរត្រង់ទៅប្រទេសឥណ្ឌា ដោយធ្វើឡើង៣ជើងក្នុងមួយសប្តាហ៍។ ហើយនៅថ្ងៃទី១៤ មិថុនា ក្រុមហ៊ុននេះនឹងបើកសម្ពោធជើងហោះហើរដំបូងជាផ្លូវការ នៅប្រទេសឥណ្ឌា ដើម្បីផ្សព្វផ្សាយបង្ហាញពីកម្មវិធីហោះហើរនេះ។
ដោយឡែកកម្មវិធីហោះហើររបស់ក្រុមហ៊ុនអាកាសចរណ៍ IndiGo វិញ លោកបានគូសបញ្ជាក់ថា បើគ្មានអ្វីប្រែប្រួលទេ ក្រុមហ៊ុនអាកាសចរណ៍ IndiGo របស់ឥណ្ឌា នឹងបើកការហោះហើរត្រង់ពី ទីក្រុងញូវដេលី មកសៀមរាប ចាប់ពីថ្ងៃទី២៧ ខែតុលា ឆ្នាំ២០២៤ ដោយធ្វើការហោះហើរ៧ជើងក្នុងមួយសប្តាហ៍។ក្រុមហ៊ុនអាកាសចរណ៍ IndiGo បានស្នើសុំហោះហើរលើដំណាក់ផ្លូវ DEL- SAI - DEL និង លើដំណាក់ផ្លូវ BOM - SAI - BOM ចំនួន៧ជើងក្នុងមួយសប្តាហ៍ ក្នុងគោលដៅ ញូវដេលី-អាកាសយានដ្ឋានសៀមរាបអង្គរ។
លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា បានលើកឡើងថា ឥណ្ឌា គឺជាទីផ្សារទេសចរណ៍ដ៏ធំមួយ សម្រាប់ពិភពលោក បន្ទាប់ពីចិន ដូច្នេះហើយការបើកជើងហោះហើរត្រង់រវាងកម្ពុជា-ឥណ្ឌា គឺជាសញ្ញាណល្អមួយ ក្នុងការទាក់ទាញប្រជាជនឥណ្ឌា ធ្វើដំណើរកម្សាន្តមកកម្ពុជា។
សម្រាប់អ្នកជំនាញរូបនេះ បើឥណ្ឌាចាប់អារម្មណ៍ត្រឹមតែ ៥% ទៅ១០% នឹងចូលរួមចំណែកជំរុញកំណើនសេដ្ឋកិច្ចកម្ពុជា តាមរយៈវិស័យទេសចរណ៍ ខណៈដែលកន្លងមកកម្ពុជា ទទួលបានភ្ញៀវឥណ្ឌាក្នុងកម្រិតមធ្យមប៉ុណ្ណោះ ដោយសារតែគ្មានជើងហោះហើរត្រង់ ហើយអ្នកដែលមានលទ្ធភាពមិនចូលចិត្តការជិះយន្តហោះដែលមានផ្ទេរពីមួយទៅមួយនោះទេ ដូច្នេះហើយការហោះហើរត្រង់នេះ នឹងទាក់ទាញដល់ភ្ញៀវ ដែលមានសក្តានុពល និងភ្ញៀវដែលមានលទ្ធភាពច្រើនមកកម្ពុជា៕
