ភ្នំពេញ៖ ព្រឹទ្ធាចារ្យចាប៉ីដងវែង គង់ ណៃ ដែលមានវ័យ៨០ឆ្នាំហើយនោះ កាលពីថ្ងៃទី ៥ ឧសភា ត្រូវបានក្រុមគ្រួសារបញ្ជូនលោកមកសម្រាកព្យាបាលនៅមន្ទីរពេទ្យជាថ្មីម្តងទៀត បន្ទាប់ពីអាការៈជំងឺចាស់របស់លោកនៅមិនទាន់មានសញ្ញាធូរស្បើយ និង រើឡើងវិញ។
បច្ចុប្បន្នព្រឹទ្ធាចារ្យចា គង់ ណៃ ក្រុមគ្រួសារបញ្ជូនមកសង្គ្រោះបន្ទាន់ក្នុងមន្ទីរពេទ្យមិត្តភាពខ្មែរសូវៀត (ពេទ្យរុស្ស៊ី) និង មានការជួយមើលថែពីក្រុមគ្រួសារ សប្បុរសជន រួមទាំងក្រុមការងាររបស់សម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជាផងដែរ។បើតាមប្រភពពីក្រុមគ្រួសារ លោកតាព្រឹទ្ធាចារ្យចា បានចេញពីបន្ទប់សង្គ្រោះបន្ទាន់ហើយ និង កំពុងតាមដានសុខភាពពីក្រុមគ្រូពេទ្យ ដោយពេលខ្លះលោកមានឡើងកម្តៅខ្លាំង ហត់ រវើរវាយជាដើម។
ព្រឹទ្ធាចារ្យចាប៉ីដងវែង គង់ ណៃ ជាសិល្បករចាប៉ីដងវែងដ៏ល្បីល្បាញនៅកម្ពុជា ដែលមានគោរមងារថា ព្រឹទ្ធាចារ្យកោសល្យវោហារ។លោកទទួលពានរង្វាន់សិល្បៈ និងវប្បធម៌ហ្វូគុអុកា (Fukuoka Prize) របស់ប្រទេសជប៉ុន កាលឆ្នាំ ២០១៧ ពានរង្វាន់សិល្បៈ និងវប្បធម៌ហ្វូគុអុកា បានបង្កើតឡើងចាប់តាំងពីឆ្នាំ ១៩៩០ មកនៅទីក្រុងហ្វូគុអុកា ប្រទេសជប៉ុន និងត្រូវផ្តល់ជូនបុគ្គល ដែលមានស្នាដៃឆ្នើម នៅក្នុងតំបន់អាស៊ី ដែលពាក់ព័ន្ធផ្នែក អប់រំ សិល្បៈ និងវប្បធម៌។
លោកព្រឹទ្ធាចារ្យចាប៉ីដងវែង គង់ ណៃ គឺជាបុគ្គលទី៣ ហើយដែលបានទទួលពានរង្វាន់នេះ បន្ទាប់ពីលោក ឆេង ផុន ជាអ្នកនិពន្ធរឿងល្ខោន ឆ្នាំ ១៩៩៧ និង លោក អាំង ជូលាន ជាអ្នកស្រាវជ្រាវខេមរសិក្សា នៅឆ្នាំ ២០១១ សម្រាប់ជនជាតិខ្មែរ។ព្រឹទ្ធាចារ្យ គង់ ណៃ បានចាប់ផ្តើមប្រឡូកនៅក្នុងវិស័យចាប៉ីដងវែងចាប់តាំងពីនៅវ័យក្មេងខ្ចីម៉្លេះ។ ពោលគឺនៅក្នុងអំឡុងពេលដែលលោកមានអាយុប្រមាណ១៣ឬ១៤ឆ្នាំ។ ជានិច្ចជាកាល លោក គង់ ណៃ បានប្រគុំតន្ដ្រីពីចាប៉ីដងវែង អមដោយការច្រៀងរៀបរាប់យ៉ាងពិរោះ អំពីប្រធានបទផ្សេងៗដូចជា សិល្បៈ វប្បធម៌ និងសាសនាជាដើម៕
