ភ្នំពេញ៖លោកស្រី កែ សួនសុភី ដែលជាកូនស្រីរបស់លោក កែ គឹមយ៉ាន និង ជាភរិយារបស់លោក ស សុខា ឧបនាយករដ្ឋមន្ដ្រីរដ្ឋមន្ត្រីក្រសួងមហាផ្ទៃ បានតុបតែងខ្លួនជា «អង្គវីរៈនារីខ្មែរព្រះនាងជ័យរាជទេវី» ក្នុងគោលបំណងបង្ហាញពីតួអង្គស្ត្រីខ្មែរដែលលះបង់គ្រប់យ៉ាង ដើម្បីស្វាមី។ការតុបតែងខ្លួនរបស់លោកស្រី កែ សួនសុភីនេះ ទទួលបានកោតសរសើរពីមហាជន និង បានចូលរួមចំណែកដ៏សំខាន់លើកស្ទួយវប្បធម៌ជាតិខ្មែរ។
តាមរយៈសំណេរលើបណ្តាញសង្គមលោកស្រី កែ សួនសុភី បានថ្លែងថា បំណងប្រាថ្នារបស់លោកស្រី គឺតែងតួអង្គវីរៈនារីខ្មែរព្រះនាងជ័យរាជទេវី ដែលជាតួអង្គសំខាន់មួយចំណោមតួអង្គខ្មែរស្ត្រីដែលលះបង់គ្រប់យ៉ាង ដើម្បីព្រះស្វាមី។សម្រាប់លោកស្រី ព្រះនាងទ្រង់យល់ច្បាស់នូវច្បាប់ព្រះពុទ្ធសាសនា ហើយព្រះនាងមានព្រះទ័យស្មោះចំពោះព្រះស្វាមី គោរពប្រតិបត្តិតាមសង្គហធម៌ រវាងស្វាមីនិងភរិយាឥតមានខ្វះចន្លោះត្រង់ណាឡើយ។ កិច្ចវត្តរបស់ភរិយាដែលត្រូវបំពេញចំពោះស្វាមី ព្រះនាងជ័យរាជទេវីបានបំពេញឥតមានសល់ចន្លោះកន្លែងណា។
