កោះកុង៖ អង្គការសត្វព្រៃនិងរុក្ខជាតិកម្ពុជា និងសហគ្រាស ហ្វីស៊ីងខេត អេកូឡូជីខល អេនធើប្រាយ ខូ អ៊ិល ធី ឌី បានរៀបចំព្រឹត្តិការណ៍ដាំកូនកោងកាងចំនួនជាង ២០០ដើម ជាលើកដំបូងដែលជាផ្នែកមួយនៃកិច្ចខិតខំប្រឹងប្រែងស្តារព្រៃកោងកាងឡើងវិញដែលដឹកនាំដោយសហគមន៍នៅកោះកាពិ។
ព្រឹត្តិការណ៍ដាំកូនកោងកាងនេះ មានការចូលរួមពីលោក អន សុធារិទ្ធ អភិបាលរង នៃគណៈអភិបាលខេត្តកោះកុង លោក វ៉េត សុនីម អនុប្រធានមន្ទីរ ទទួលបន្ទុកតំបន់ការពារធម្មជាតិ លោក អ៊ុល រ៉ាន់ ប្រធានការិយាល័យដែនជម្រកសត្វព្រៃ តំណាងក្រុមប្រឹក្សាឃុំកោះកាពិ គណៈកម្មាធិការតំបន់ការពារសហគមន៍កោះកាពិ និងកោះស្រឡៅ បុគ្គលិកមកពីមន្ទីរបរិស្ថានខេត្ត និងសមាជិកសហគមន៍។
ដើមកោងកាងដែលដាំថ្មីទាំងនេះ ត្រូវបានដាំលើផ្ទៃដីប្រមាណ ០,៣ ហិកតា ដែលជាជំហានដំបូងឆ្ពោះទៅគោលដៅស្តារឡើងវិញនូវព្រៃកោងកាងចំនួន ៤០០ ហិកតា នៅភាគខាងជើងនៃខេត្តកោះកុង ក្រោមគម្រោង «ពង្រឹងតំបន់ការពារសមុទ្រ» ដឹកនាំដោយអង្គការសត្វព្រៃនិងរុក្ខជាតិកម្ពុជា និង សហគ្រាស ហ្វីស៊ីងខេត អេកូឡូជីខល អេនធើប្រាយ ខូ អ៊ិល ធី ឌី ដែលជាដៃគូអនុវត្តក្នុងសកម្មភាពនេះ។
ជាមួយគ្នានេះ ការស្ដារឡើងវិញនូវព្រៃកោងកាង គឺដើម្បីការជួយទប់ស្កាត់ការបាត់បង់ជីវៈចម្រុះ និងពង្រឹងជីវភាពរស់នៅសហគមន៍ដូចជាការបង្កើនធនធានជលផល ទប់ស្កាត់នឹងបម្រែបម្រួលអាកាសធាតុ និងប្រយោជន៍ផ្នែកអេកូទេសចរណ៍ ផងដែរ៕
