ភ្នំពេញ៖ ក្រុមហ៊ុនអាកាសចរណ៍ Emirates ដែលជាក្រុមហ៊ុនអាកាសចរណ៍ អន្តរជាតិធំជាងគេនឹងចាប់ផ្តើមផ្ដល់សេវាកម្មជើងហោះហើរប្រចាំថ្ងៃមកកម្ពុជាឡើងវិញ នៅថ្ងៃទី ១ ខែឧសភាខាងមុខ ក្រោយពីបានផ្អាក កាលពីឆ្នាំ ២០២១។ក្នុងការតភ្ជាប់ជើងហោះជើរនេះ នឹងធ្វើការហោះហើរពីឌូបៃ-សិហ្កាពួ-ភ្នំពេញ និង ភ្នំពេញ-សិហ្កាពួ-ឌូបៃ ក្នុង១ថ្ងៃ១ជើង និង មួយសប្តាហ៍៧ជើង និង អាចប្រើប្រភេទយន្តហោះ 777 Boeing ឬ Airbus 350។
ក្រុមហ៊ុនអាកាសចរណ៍ Emirates បានពន្យល់ថា ការបន្តសេវាកម្មដឹកភ្ញៀវធ្វើដំណើរឡើងវិញនៅពេលនេះ បង្ហាញពីការប្តេជ្ញាចិត្តក្នុងការពង្រឹងសេវាកម្មរបស់ខ្លួននៅបណ្តាញអាស៊ីអាគ្នេយ៍ បន្តបង្កើតឱកាសកាន់តែច្រើនសម្រាប់អ្នកធ្វើដំណើរ ដើម្បីស្វែងរកគោលដៅ ចម្រុះ វប្បធម៌សម្បូរបែប ជួយអាជីវកម្ម និង អ្នកនាំចេញគ្រប់ទំហំ បង្កើតទំនាក់ទំនងពាណិជ្ជកម្មកាន់តែរឹងមាំ។
លោក ស៊ីន ចាន់សិរីវុត្ថា អ្នកនាំពាក្យអាកាសចរស៊ីវិល បានថ្លែងប្រាប់ ស៊ីស៊ីថាមស៍ថា ក្រុមហ៊ុនអាកាសចរណ៍ Emirates បានរៀបចំឯកសាររួចរាល់ហើយ សម្រាប់ដំណើរការបើកជើងហោះហើរមកកម្ពុជា ពីឌូបៃ-សិហ្កាពួ-ភ្នំពេញ និង ភ្នំពេញ-សិហ្កាពួ-ឌូបៃ ក្នុង១ថ្ងៃ១ជើង។ក្រុមហ៊ុនអាចនឹងប្រើយន្តហោះប្រភេទ 777 Boeing ឬ Airbus 350 តាមជាក់ស្តែង។
គួរបញ្ជាក់ថា ក្រុមហ៊ុនអាកាសចរណ៍ Emirates បានបើកជើងហោះហើរលើកដំបូងកាលពីឆ្នាំ ២០១៧ ពីទីក្រុងឌូបៃមកភ្នំពេញ។ ក្រុមហ៊ុនបានផ្អាកដំណើរការសេវាកម្មក្នុងឆ្នាំ ២០២១ ដោយសារបញ្ហាឆ្លងរាតត្បាតជំងឺកូវីដ១៩។បច្ចុប្បន្ននេះ មានក្រុមហ៊ុនចំនួន៣ហើយតភ្ជាប់ជើងហោះហើរត្រង់ជាមួយកម្ពុជា ក្នុងនោះមាន អារ៉ាប់រួម ឡាវ និង ឥណ្ឌា៕
