កោះកុង៖ រដ្ឋបាលជលផល នាថ្ងៃទី ២១ មីនា បានធ្វើការកោតសរសើរដល់ក្រុមហ៊ុនកោះអភិជនរីសត និងរដ្ឋបាលឃុំកោះស្តេច ដែលបានសង្គ្រោះនិងលែងអណ្ដើកសមុទ្រប្រភេទល្មិច (Chelonia mydas) ចំនួន ២ក្បាលចូលក្នុងសមុទ្រវិញ កាលពីថ្ងៃទី ១៩ ខែមីនា ឆ្នាំ២០២៤កន្លងទៅ នៅភូមិកោះស្តេច ឃុំកោះស្ដេច ស្រុកគិរីសាគរ ខេត្តកោះកុង។
ការលែងនេះ មានការចូលរួមពីមន្រ្តីខណ្ឌរដ្ឋបាលជលផលកោះកុង នៃក្រសួងកសិកម្ម រុក្ខាប្រមាញ់ និងនេសាទ លោកជំទប់ទី១ ឃុំកោះស្តេច ខេត្តកោះកុង និងតំណាងក្រុមហ៊ុនអភិជនរីសត។ អណ្ដើកសមុទ្រទីមួយ មានទំហំស្នូកបណ្ដោយ៥០សង់ទីម៉ែត្រ ទទឹង៤៦សង់ទីម៉ែត្រ ទម្ងន់១៣,៧ គីឡូក្រាម និងបានកិបស្លាកសម្គាល់ KH2402 និងអណ្ដើកសមុទ្រទីពីរ មានទំហំស្នូកបណ្ដោយ៥០សង់ទីម៉ែត្រ ទទឹង៤៥សង់ទីម៉ែត្រ ទម្ងន់១០,១ គីឡូក្រាម និងបានកិបស្លាកសម្គាល់ KH2403។
គួរបញ្ជាក់ថា អណ្ដេីកសមុទ្រត្រូវបានចាត់ជាប្រភេទធនធានជលផលសមុទ្រកំពុងរងគ្រោះថ្នាក់ និងត្រូវបានការពារដោយច្បាប់ស្ដីពីជលផល ដូច្នេះរដ្ឋបាលជលផល បានអំពាវនាវដល់បងប្អូនប្រជានេសាទទាំងអស់រួមគ្នាការពារនិងអភិរក្សសត្វអណ្ដេីកសមុទ្រឲ្យបានគង់វង្សសម្រាប់កូនចៅជំនាន់ក្រោយ៕
