ភ្នំពេញ៖ ដើម្បីឲ្យគម្រោងអភិវឌ្ឍអាកាសយានដ្ឋានអន្តរជាតិតេជោ លំដាប់ថ្នាក់ 4F ធំជាងគេនៅកម្ពុជា និង លំដាប់ថ្នាក់ខ្ពស់បំផុតនៃស្តង់ដាអង្គការអាកាសចរណ៍ស៊ីវិលអន្តរជាតិមួយនេះ បញ្ចប់បានពេញលេញស្របតាមផែនការមេ និងដំណាក់កាលសាងសង់ដែលបានគ្រោងទុក លោក ម៉ៅ ហាវណ្ណាល់ រដ្ឋលេខាធិការដ្ឋានអាកាសចរណ៍ស៊ីវិល បានស្នើសុំដល់គ្រប់បណ្ដាវិនិយោគិនទាំងអស់ ជាពិសេស ធនាគារពាណិជ្ជនឹងបន្តគាំទ្រផ្តល់ហិរញ្ញប្បទានបន្ថែមទៀត តាមរយៈការទិញសញ្ញាប័ណ្ណនៅពេលដែលមានតម្រូវការបោះផ្សាយសញ្ញាប័ណ្ណបន្ថែមរបស់ក្រុមហ៊ុន ខេមបូឌា អ៊ែរផត អ៊ិនវេសមិន ខូអិលធីឌី នៅពេលក្រោយទៀត។
ការស្នើសុំនេះ ធ្វើឡើងក្នុងពិធីចុះត្រួតពិនិត្យវឌ្ឍនភាពនៃគម្រោងសាងសង់អាកាសយានដ្ឋានអន្តរជាតិតេជោ នៅថ្ងៃទី១២ ខែមីនា ឆ្នាំ២០២៤។
គិតត្រឹមថ្ងៃទី២១ ខែកុម្ភៈ ឆ្នាំ២០២៤ ការសាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F ដំណាក់កាលទីមួយ សម្រេចបានប្រមាណ ៦៦.១% និងបានចំណាយទឹកប្រាក់សរុបសម្រាប់ការសាងសង់ចំនួន ៩៦១ លានដុល្លារអាមេរិក នៃគម្រោងទឹកប្រាក់វិនិយោគសរុបចំនួន១,៥០០ លានដុល្លារ។
ផ្អែកតាមផែនការ និងទំហំការងារដែលសម្រេចបានត្រឹមថ្ងៃទី២១ ខែកុម្ភៈ ឆ្នាំ២០២៤ ដូចបានបញ្ជាក់ជូនខាងលើនេះ អាកាសយានដ្ឋានអន្តរជាតិតេជោ លំដាប់ថ្នាក់ 4F ដំណាក់កាលទីមួយគ្រោងនឹងបើកឲ្យដំណើរការនាឆមាសទីមួយ ឆ្នាំ២០២៥ ខាងមុខនេះ៕
