ភ្នំពេញ៖រដ្ឋាភិបាលកម្ពុជា បានសម្រេចឱ្យផ្អាកការនាំចូល «គ្រឿងក្នុង និងបំណែកសាច់បង្កក»ជាបណ្តោះអាសន្នក្នុងរយៈពេល ៦ ខែ។ក៏ប៉ុន្តែ ការផ្អាកនាំចូលនេះ មានការលើកលែងចំពោះការនាំចូលរបស់គម្រោងវិនិយោគ មានលក្ខណៈសម្បត្តិគ្រប់គ្រាន់ សម្រាប់ប្រើប្រាស់ជាធាតុចូលផលិតកម្មសម្រាប់ការនាំចេញ។
យោងតាមសេចក្តីជូនដំណឹង បានគូសបញ្ជាក់ថា ប្រភេទទំនិញដែលត្រូវផ្អាកនាំចូលនោះ រួមមាន អណ្តាត សត្វគោ ក្របី បង្កក ។គ្រឿងក្នុងរបស់សត្វគោ ក្របី ដែលអាចបរិភោគបាន គ្រឿងក្នុងជ្រូក និងគ្រឿងក្នុងមាន់ ជាដើម។ការផ្អាកការនាំចូល ជាបណ្ដោះអាសន្ននេះ គឺចាប់ផ្តើមអនុវត្តចាប់ពីថ្ងៃទី១២ ខែមីនា ដល់ថ្ងៃទី១២ ខែកញ្ញា ឆ្នាំ២០២៤។
ប៉ុន្តែចំពោះការនាំចូលរបស់គម្រោងវិនិយោគ មានលក្ខណៈសម្បត្តិគ្រប់គ្រាន់ សម្រាប់ប្រើប្រាស់ជាធាតុចូលផលិតកម្មសម្រាប់ការនាំចេញ ត្រូវបានលើកលែង។នេះបើយោងតាមសេចក្តីជូនដំណឹង។
ជាការកត់សម្គាល់ ការបិទការនាំចូល«គ្រឿងក្នុងសត្វ និងសាច់បង្កក»៦ខែទៀតនេះ ធ្វើឡើងក្រោយពីនៅរយៈពេលចុងក្រោយនេះ អាជ្ញាធរបានរកឃើញសាច់បង្កកខុសច្បាប់ជិត៤០០តោនដែលនាំចូលពីក្រៅប្រទេសស្តុកក្នុងឃ្លាំទំនិញមួយកន្លែងស្ថិតក្នុងខណ្ឌសែនសុខ រាជធានីភ្នំពេញ។ សាច់បង្កកទាំងនោះរួមមានសាច់មាន់ គ្រឿងក្នុងមាន់ សាច់ជ្រូក និងសាច់ក្របីជាដើម។
